O‘zbekiston sog‘liqni saqlash vazirligining ba’zi boshqarmalariga rahbarlar va o‘rinbosar tayinlandi, deya xabar bermoqda vazirlik matbuot xizmati.
Xususan, sog‘liqni saqlash vazirining tegishli buyrug‘i bilan Rizqiyev Umidulla Rahmatullayevich vazirlikning Davolash-profilaktika yordamini tashkillashtirish bosh boshqarmasi boshlig‘i vazifasini bajaruvchi etib tayinlandi.
Bunga qadar u Respublika shoshilinch tibbiy yordam ilmiy markazining Toshkent shahar tez tibbiy yordam stansiyasi bosh shifokori lavozimida faoliyat ko‘rsatgan.
Falsafa fanlari doktori (PhD) Umidulla Rizqiyev 1982-yilda Toshkent shahrida tug‘ilgan. 2006-yilda Toshkent tibbiyot akademiyasini tamomlab, Respublika ixtisoslashtirilgan onkologiya va radiologiya ilmiy-amaliy tibbiyot markazida ish boshlagan.
U o‘z faoliyati davomida Respublika shoshilinch tibbiy yordam ilmiy markazida shifokor-xirurg, markazning 1-shoshilinch xirurgiya bo‘limi mudiri, bosh shifokorning xirurgiya bo‘yicha o‘rinbosari, qabul tashxislar bo‘limi mudiri, davolash ishlari bo‘yicha direktor o‘rinbosari kabi mas’uliyatli vazifalarda ishlab kelgan.
Shuningdek, vazirning tegishli buyrug‘i bilan Bo‘riyev Bahodir Rahmonovich vazirlikning Sog‘liqni saqlash tizimi infratuzilmasini rivojlantirish va qurilishini tashkillashtirish boshqarmasi boshlig‘i etib tayinlandi.
Bunga qadar u mazkur boshqarmada boshliq o‘rinbosari lavozimida faoliyat yuritib kelayotgan edi.
53 yoshli B.Bo‘riyev Toshkent davlat texnika universitetini tamomlagan bo‘lib, ko‘pgina tashkilotlarda mas’ul lavozimlarda faoliyat yuritgan. 2005-yil “Mehnat shuhrati” ordeni bilan taqdirlangan.
Shu bilan birga, sog‘liqni saqlash vazirining tegishli buyrug‘i bilan Usmanov Avazbek Tolmasovich vazirlikning Davolash-profilaktika yordamini tashkillashtirish bosh boshqarmasi boshlig‘i o‘rinbosari — Birlamchi tibbiy profilaktika yordamini muvofiqlashtirish boshqarmasi boshlig‘i etib tayinlandi.
Tibbiyot fanlari nomzodi A.Usmanov 1974-yilda Qo‘qon shahrida tug‘ilgan. O‘z faoliyatini Qo‘qon shahridagi 1-son shahar shifoxonasida neyrotravmatologiya bo‘limida stomatolog-xirurg vazifasidan boshlagan. Keyinchalik Qo‘qon shahar shoshilinch tibbiy yordam shifoxonasida neyrotravmatologiya bo‘limi stomatolog-xirurgi, so‘ng Qo‘qon shahar diagnostika markazi bosh shifokori vazifasida ishlagan.
Mutaxassis 2017-yildan buyon Qo‘qon shahar shoshilinch tibbiy yordam shifoxonasi bosh shifokori sifatida faoliyat yuritib kelgan.
Bundan tashqari, vazirning tegishli buyrug‘i bilan Mohigul Toshnazarova vazirlikning Davlat tibbiyot tashkilotlarida dori vositalari va tibbiy buyumlarga bo‘lgan ehtiyojni shakllantirish boshqarmasi boshlig‘i o‘rinbosari etib tayinlandi.
M.Toshnazarova 2014-yilda Toshkent farmatsevtika institutini tamomlagan. Shu paytga qadar “Qashqadaryo dori-darmon” AJda dorixonalarni nazorat qilish inspektori, ushbu muassasa bo‘limi boshlig‘i lavozimlarida faoliyat yuritgan.
Bundan avval O‘zbekiston tashqi ishlar vaziriga yangi o‘rinbosar, Din ishlari bo‘yicha qo‘mitaga yangi rais hamda Urganch hokimiga yangi o‘rinbosarlar tayinlangani haqida xabar berilgandi.
Izoh (0)