Pekin birinchi marta milliarderlar soni eng ko‘p bo‘lgan shaharga aylandi. Bu haqda Daily Mail nashriga tayanib, Tengrinews xabar berdi.
Forbes’ning milliarderlar ro‘yxatida ma’lum bo‘lishicha, 2020-yil yakunlariga ko‘ra, Pekinda 100 nafar milliarder yashagan, Nyu-Yorkdagidan bir nafarga ko‘p.
Bir yilda Xitoy poytaxtida 33 nafar, Nyu-Yorkda esa yetti nafar yangi milliarder paydo bo‘ldi. Pekin aholisi 21 million kishini tashkil etadi. Bu ko‘rsatkich Nyu-Yorknikidan (aholisi 8,4 million kishi) 2,5 barobarga ko‘proq.
Pekinning eng boy fuqarosi TikTok ijtimoiy tarmog‘ining muassisi bo‘lgan ByteDance kompaniyasining asoschisi Chjan Imin bo‘lib, uning boyligi 35,6 milliard dollarga baholandi. Nyu-Yorkning sobiq meri Maykl Blumberg o‘zi istiqomat qiladigan shaharning eng boy odami hisoblanadi. Uning boyligi 59 milliard dollarni tashkil qiladi.
Shuningdek, Pekindan tashqari, eng ko‘p milliarderlar istiqomat qiladigan shaharlar ro‘yxatiga Xitoyning yana to‘rtta shahri kiritildi. Ro‘yxatda Gonkong (80 nafar milliarder) uchinchi, Shenchjen (68 nafar milliarder) beshinchi, Shanxay (64 nafar milliarder) oltinchi hamda Guanchjou (47 nafar milliarder) o‘ninchi o‘rinni band qildi. AQShda Nyu-Yorkdan boshqa ro‘yxatga kirgan yagona shahar San-Fransisko (48 nafar milliarder) bo‘ldi, u ro‘yxatda 8-o‘rinni egalladi.
Xabar berilishicha, AQShda boshqa mamlakatlarga qaraganda ko‘proq milliarderlar yashaydi va mamlakat avvalgidek 724 nafar milliarder bilan yetakchilik qilmoqda. Xitoy Gonkong va Makaoni o‘z ichiga olgan holda, 698 nafar milliarder bilan ikkinchi o‘rinda turadi. Ro‘yxatning keyingi o‘rinlarini Hindiston (140 nafar milliarder), Germaniya (136 nafar milliarder) va Rossiya (117 nafar milliarder) davlatlari band qilgan.
Avvalroq Forbes’ning dunyodagi eng boy odamlar ro‘yxatidan olti nafar qozog‘istonlik o‘rin egallagani, shuningdek, Telegram messenjerining asoschisi Pavel Durov BAAning eng boy odami deb tan olingani haqida xabar berilgandi.
Izoh (0)