Pavel Durov BAAning eng boy odami deb tan olindi

Telegram messenjerining asoschisi Pavel Durov 2021-yilgi Forbes’ning dunyodagi eng boy odamlar reytingida 112-o‘rinni egalladi. Uning boyligi 17,2 milliard dollarga baholandi. Bu ko‘rsatkich 2020-yilda 13,8 milliard dollarga o‘sgan edi, deb xabar berdi Spot.

Forbes’ning yozishicha, Durov Rossiya fuqarosi, lekin u Birlashgan Arab Amirliklari (BAA) tadbirkori hisoblanadi.

Telegram asoschisi ushbu mamlakatning eng boy odami deb tan olindi. Ikkinchi o‘rinni 4,8 milliard dollar kapital bilan Lulu Group savdo tarmoqlarining egasi Yusuf Ali M.A. band qildi. U ham Durov kabi chet el fuqarosi (hindistonlik) hisoblanadi.

Majid Al Futtaim kompaniyasining asoschisi Majid al-Futtaim reytingda uchinchi o‘rinni egalladi. Shuningdek, al-Futtaim O‘zbekistondagi Carrefour supermarketiga ham egalik qiladi.

2014-yil Rossiyadan ketganidan so‘ng Durov ko‘p sayohat qildi va 2017-yildan Dubayda doimiy yashay boshladi. U yerda Telegram’ning shtab kvartirasi joylashgan.

Bir necha yil oldin Telegram asoschisi BAA kabi konservativ mamlakatda yashashning o‘ziga xos qiyinchiliklari borligini aytgan edi, lekin u yerdagi hayotni yoqtirib qolganini ham tan olgan.

Kompaniyaning shtab-kvartirasi Dubai Media City erkin iqtisodiy zonasidagi osmono‘par binolardan birida joylashgan. Soliq to‘lovlari yo‘qligi uchun jamoa shu yerni tanlagan.

Ma’lumot uchun, fevral oyi oxirida Da Vinci Capital sarmoyadorlari Pavel Durovga Telegram Open Network Inc (TON) va Telegram Inc kompaniyalariga qarshi da’vo ochish niyati haqida bildirishnoma xati yubordi. Forbes ma’lumotlariga ko‘ra, investorlar TON blokcheyn platformasining muvaffaqiyatsiz loyihasi uchun 100 million dollar miqdorida tovon puli talab qilmoqda.