Respublikada infratuzilmadagi muammolar tufayli 320 ta tadbirkor so‘nggi 2 yilda import qilgan 220 million dollarlik asbob-uskunalarini ishga tushira olmayapti. Bu haqda bugun, 8-aprel kuni Prezident Shavkat Mirziyoyev raisligida bo‘lib o‘tayotgan videoselektor yig‘ilishida ma’lum qilindi, deya xabar bermoqda “Daryo” muxbiri.
Shavkat Mirziyoyev 2021-yilda tadbirkorlarda energiya ta’minoti va boshqa infratuzilma bilan bog‘liq muammolar bo‘lmasligi kerakligini alohida ta’kidlab o‘tdi.
“Misol uchun, elektr quvvati past bo‘lgani bois Yangihayot tumanidagi 24 ta korxonada 2,5 mingta ish o‘rni va eksportdan yiliga 25 million dollar yo‘qotilmoqda. Umuman, respublikada infratuzilmadagi muammolar tufayli 320 ta tadbirkor so‘nggi 2 yilda import qilgan 220 million dollarlik asbob-uskunalarini ishga tushira olmayapti”, – dedi davlat rahbari.
Ma’lum qilinishicha, 2021-yilda tadbirkorlarning elektr energiyasi bilan bog‘liq muammolarni hal qilishga 560 milliard so‘m ajratilgan. Bundan tashqari, viloyat hokimlari bilan birga, bir oy muddatda muammosi mavjud sanoat zonalarini xatlovdan o‘tkazib, elektr ta’minotini yaxshilash bo‘yicha ishlar boshlanadi. Bunga yana qo‘shimcha 300 milliard so‘m ssuda mablag‘lari ajratiladi.
“Qosimov joyiga chiqib, tadbirkorlarning infratuzilma bilan bog‘liq muammolari hal qilinganini o‘rganadi va aybdorlarni ishdan olish va jarima qilish bo‘yicha har o‘n besh kunda bosh vazirga taklif kiritib boradi”, – dedi Prezident Shavkat Mirziyoyev.
Bundan avval O‘zbekistonda chekka hududlardagi yer uchastkalarini 50 foizgacha chegirma bilan sotuvga qo‘yish tartibi ishlab chiqilishi hamda Shavkat Mirziyoyev uch oy ichida sektor rahbarlari tadbirkorlar bilan ishlashda natija qilmasa, ishdan olinishi haqida ogohlantirgani haqida xabar berilgandi.
Izoh (0)