O‘zbekiston xalq artisti, “El-yurt hurmati” ordeni sohibi Ubaydulla Baqoyev (Ubaydulla Omon) 73 yoshida 44 yoshli qizga uylangani haqida xabar berilgan edi. Taniqli aktyor “Sevimli” telekanalining “Xayrli oqshom” ko‘rsatuvi mehmoni bo‘ldi hamda o‘zidan salkam 30 yosh kichik ayolga uylanganiga farzandlari qanday munosabat bildirgani haqida so‘zlab berdi.

Foto: YouTube

“Farzandlarim xotinimni birinchi kundan yaxshi qabul qildi. Nargiza ham, Nigina ham (aktyorning qizlari). Ularga tanishtirdim: ‘Mana, Nilufar, ingliz tilidan dars beradi, menga ma’qul bo‘ldi’, dedim. Hammalari xursand bo‘lib, qabul qildi. Mening farzandlarim juda aqlli. Ular ko‘p kitob o‘qiydi. Kitob o‘qigan odam hayotda kamdan kam xato qiladi. Chunki kitob bergan tavsiyalar ularning xayolida bo‘ladi. Qizlarim juda ko‘p kitoblar o‘qigan, jahon romanlarini o‘qigan. Ular hayotda shunday voqealar bo‘lishini biladi. Yolg‘izlik Allohga xos, insonning yonida kimdir bo‘lishi kerak. Hayot bu bayram emas. Hayot og‘ir, mashaqqatli yo‘l. Unda tashvishli kunlar ko‘p bo‘ladi, mana shunday kunlarda yoningizda kimdir bo‘lishi kerak. Shuning uchun, Xudoga shukur, hayotimda yangi bir sahifa boshlandi”, — deydi aktyor.

“Xotinim o‘lgan kuni jasadni olib ketayotganimizda Nilufar mashinada o‘tirgan bo‘lgan va dugonasidan so‘ragan ‘Kim bu, shunaqa fayzli kunda vafot etibdi?’, deb. Xotinim Ramazonning 10-sanasida vafot etgan edi. Dugonasi ‘Ubaydulla Omonning xotini, vrach edilar’, degan. Oradan bir yil o‘tib, yil oshi berayotganimda o‘sha joyda men Nilufar bilan tasodifan tanishib qoldim ”, — deydi Ubaydulla Omon ikkinchi rafiqasi bilan qanday tanishgani haqida.