Rafiqalari uchun sovg‘aga pul ayamaydigan 5 mashhur erkak (foto)

Barcha badavlat insonlar oilasi yoki rafiqasi uchun sovg‘a olishda pulni ayamaydi, deyish noto‘g‘ri. Sababi ularning orasida tejamkor yoki ziqnalari ham bor. Ammo bugungi qahramonlarning rafiqalari turmush o‘rtoq borasida ancha omadli. Chunki ular bayramlarda kutilmagan qimmatbaho sovg‘alarni qabul qilib oladi.

Devid Bekxem

Mashhur futbolchi muhtojlarga yordam berishi hamda xayriya ishlarida faol qatnashishi ko‘pchilikka ma’lum. Shuningdek, yulduz oilasiga ham maksimal darajada e’tibor qaratadi. U rafiqasi Viktoriyaning biznesiga salkam 32 million dollar sarmoya kiritgan. Viktoriyaning tug‘ilgan kunida esa timsoh terisiga olmos bilan ishlov berilgan 280 ming dollarlik Birkin sumkasini sovg‘a qilgan.

Jey Zi

Albatta, Jey Zini rafiqasi uchun sarflagan puliga qarab, oilasiga sodiq deb bo‘lmaydi. Ammo Beyonsening tug‘ilgan kunida 350 ming dollarga Birkin sumkasi, 4 million dollarga orol hamda o‘nlab zargarlik buyumlarini sovg‘a qilgan. Reperning rafiqasiga sovg‘a qilgan eng qimmatbaho hadyalaridan biri bahosi 5 million dollar bo‘lgan 18 qirotli olmos uzuk edi.

Jigan

Jigan ham sevimli rafiqasi Oksana Samoylovaga bir qancha hashamatli sovg‘alarni taqdim etgan. Katta qizi Ariela tug‘ilganidan so‘ng 130 ming dollarlik Bentley Continental avtomobili, keyinroq 262 ming dollar qiymatga ega Rolls-Royce Wraith mashinasini sovg‘a qilgan.

Kanye Uest

Reper Kim Kardashyanga bir necha restoranlar sovg‘a qilgan. Shuningdek, yulduzning rafiqasiga atalgan yana bir qancha ajoyib sovg‘alari ham mavjud edi. Masalan, qutida Airpods, Adidas kompaniyasiga tegishli paypoq va Mikki Maus o‘yinchog‘ini hadya etdi. Lekin bu oddiy sovg‘alar bilan bir qatorda Apple, Adidas, Disney, Amazon va Netflix kompaniyalarining qiymati 200 ming dollardan ortiq bo‘lgan aksiyalar ham mavjud edi. Afsuski, reperning saxiyligi ham oilani mustahkamlay olmadi.

Roman Abramovich

Roman Abramovich tarixda ham eng saxiy inson sifatida qolishi aniq. U o‘zining 100 million dollarlik badiiy to‘plamini sobiq rafiqasi Darya Jukovaga hadya qilgan. Ommaviy axborot vositalarida tarqalgan ma’lumotlarga ko‘ra, ushbu kolleksiyaga rus rassomi Ilya Kabakovning 30-60 million dollarlik 40 ta surati, Frensis Bekonning 86 million dollar va Lyusen Freydning 33 million dollarlik asarlari kiritilgan.