Ijtimoiy tarmoqlar foydalanuvchilari Perseverance marsoxodi tomonidan olingan suratlarning birida kamalakni yodga soluvchi noodatiy tabiat hodisasini payqab qoldi, deb yozadi Hi-Tech.Mail.ru.
Nashrning yozishicha, Marsning atmosferasi va tuzilishining o‘ziga xosligi sabab u yerda kamalak bo‘lishi mumkin emas. Shu sababli ushbu holat bulutlarda qotib qolgan muz kristallarining akslanishi natijasida yuzaga kelgan bo‘lishi mumkin. Yana buni qor yuzaga keltirgan bo‘lishi ham mumkin — yilning bu vaqtida qor sayyoraning ayrim hududlarida saqlanib qolgan.
Forbes jurnalisti mazkur holatga oydinlik kiritish maqsadida NASA xodimlariga murojaat qilgan. Kosmik agentlik muhandisi Deyv Laverining aytishicha, bu kamalak bo‘lishi mumkin emas, balki shunchaki linzalarning o‘ziga xosligi sabab yuzaga kelgan obyektivning noto‘g‘ri ko‘rsatishi hisoblanadi. Bu kabi holatni smartfon kamerasi obyektiviga quyosh nurlari to‘g‘ridan to‘g‘ri tushganda ham kuzatish mumkin.
E’lon qilingan suratda Ingenuity mini-vertolyotini payqash mumkin, hozirda u 11-aprel kuni amalga oshiriladigan birinchi parvoziga tayyorlanmoqda. Kelajakda undan sayyorani tadqiq etishda marsoxodga yordamchi sifatida foydalaniladi.
Eslatib o‘tamiz, 2020-yilning 31-iyun sanasida NASA bortiga Perseverance nomli yangi apparat o‘rnatilgan Atlas V raketa-tashuvchisini Kanaveral sahrosidan uchirgan edi. 2021-yil 9-fevralga o‘tar kechasi Perseverance tadqiqot apparati Marsga muvaffaqiyatli qo‘nishni amalga oshirdi. Qo‘nish, taxminan, yetti daqiqa davom etgan. Bu vaqt mobaynida barcha operatsiyalar avtomatik rejimda amalga oshirilgan.
Izoh (0)