Yevropa Chempionlar Ligasi chorak finali dastlabki bahsi doirasida 6-aprel kuni kechgan “Real” — “Liverpul” uchrashuvidan (3:1) keyin har ikki jamoa murabbiylar ishtirokida matbuot anjumani o‘tkazildi.

Foto: Twitter

Mersisaydliklar ustozi bu mag‘lubiyatdan so‘ng YChL 2018/19-yilgi mavsumi yarim finalida “Barselona”ga qarshi o‘yinda 0:3 hisobidagi mag‘lubiyatdan keyingi kambekni yodga oldi. O‘shanda “qizillar” o‘z uyida katalonlarni 4:0 hisobida yenggandi.

“Barselona”ga 0:3 hisobida yutqazgan uchrashuvimizda jamoam yaxshi o‘yin o‘tkazgandi. Biroq bu safar unday bo‘lmadi. “Real” yaxshiroq o‘ynadi. Biroq biz ularga muammo tug‘dirishga qodirmiz.

“Barselona”ga qarshi o‘yindagi kambekning 80 foizi muxlislar tufayli bo‘lgandi, hozir vaziyat boshqacha. Biroq va’da beraman, biz bor kuchimizni ishga solamiz, qolganini ko‘ramiz.

Yurgen Klopp, “Liverpul” bosh murabbiy

Foto: Twitter

Shuningdek, madridliklar ustozi Zinedin Zidan ham o‘yin haqidagi fikrlari bilan o‘rtoqlashdi.

G‘alaba xursand qiladi, biroq umumiy olganda hissiyotlar aralash. Biz ajoyib o‘yin o‘tkazdik, lekin ikkinchi bo‘lim boshida qiyinchilikka uchradik. Har bir o‘yinchimdan faxrlanaman. Ammo oldinda yana bitta o‘yin bor.

Ikkinchi bo‘limda ular birinchi zarbadayoq gol urdi. Bu yoqimsiz, biroq bu futbol. Vinisius gol urganidan xursandman, bu unga kerak edi. U yaxshi harakat qilyapti, jamoaga yordam beryapti va bunday gol urgandan keyin qo‘shimcha quvvat yig‘moqda.

Hozir g‘alabadan zavq olamiz. Oldimizda muhim o‘yin (“Barselona”ga qarshi) kutib turganini bilamiz, ammo avvaliga tiklanib olish zarur.

Zinedin Zidan, “Real” bosh murabbiyi

“Liverpul” va “Real” jamoalari o‘rtasidagi javob uchrashuvi 14-aprel kuni bo‘lib o‘tadi.

Eslatib o‘tamiz, “Real” La Liga doirasida 10-aprel kuni “Barselona”ga qarshi bahs yuritadi

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!