AQShda Rebekka Rouz va Piter Kacharginskiy ismli juftlik bir-birini nikoh rishtalari bilan bog‘lashning noodatiy usulini topdi. Ular nikoh uzugi o‘rniga ancha ishonchli vositadan — blokcheyn-akkauntlarga bog‘langan almashtirib bo‘lmaydigan tokenlardan (NFT) foydalangan, deb xabar beradi Esquire.

Foto: Twitter / @Rgoldilox

To‘y yahudiylarning an’anaviy marosimi kabi boshlangan, keyin esa juftlik ko‘chaga chiqib smartfonlarini olgan, shaxsiy NFT’larini faollashtirgan va ular bilan almashgan.

“Odamlarning ko‘pchiligi diniy maskanlarda, plyaj yoki tog‘larda nikoh quradi. Piter va men aksariyat odamlar emasmiz. Biz blokcheyn yordamida oila qurdik”, — deb yozadi Rouz o‘zining Twitter’dagi sahifasiga.

Foto: Twitter / @Rgoldilox

To‘y tokenlari Tabaat deyiladi (ivritchada “uzuk”) va ular ikki nusxada mavjud, yangilarini qo‘shib bo‘lmaydi. Tokenlar animatsiyasini Karl Yoxan Xasselrot ismli rassom yaratgan. Rouzning so‘zlariga ko‘ra, “illyustratsiya ikkita tarkibiy qismning yakdilligi ramzi” hisoblanadi.

Nazariy jihatdan bu usuldagi “to‘y onlari” abadiy mavjud bo‘ladi va internetning istalgan foydalanuvchisi ixtisoslashgan platforma orqali bunga ishonch hosil qila oladi.

Avvalroq Twitter rahbari Jek Dorsi o‘zining birinchi tvitini sotuvga qo‘ygani, u allaqachon 2,5 million dollarga baholangani to‘g‘risida xabar berilgandi.