Xiaomi o‘zining kollektiv moliyalashtirish platformasi orqali lapsha ishlab chiqarishga mo‘ljallangan 30 dollarli qurilmani taklif etmoqda, deb xabar beradi IXBT.
Foto: IXBT
Kribee Big V Handheld Noodle Maker nomi ostidagi qurilma noyob dizayni uchun Red Dot 2021 mukofotini qo‘lga kiritishga ulgurdi. Gadjet ixtirochilarining ta’kidlashicha, u uy sharoitida mazali lapsha tayyorlash jarayonini maksimal darajada soddalashtirish va tezlashtirish imkonini beradi.
Foydalanuvchilardan faqat unni suv bilan kerakli miqdorda aralashtirish, so‘ng tayyor bo‘lgan xamirni maxsus bo‘lmaga solish talab etiladi. Qurilma bir marta ishlash orqali 200 gramm lapshani tayyorlash imkonini beradi. Shu bilan birga, butun jarayon 15 soniyadan oshmaydi, xamir qoldiqlari idish yoki qurilma chetlariga yopishmaydi.
Lapsha tayyorlashga mo‘ljallangan Kribee Big V Handheld Noodle Maker portativ qurilmasi juda yengil va ixcham, uni saqlash uchun katta joy kerak emas. Shuningdek, gadjet istalgan rozetkadan turib ishlay oladi.
Avvalroq Xiaomi “uchtasi birda” fonarini, eng arzon elektroskuterni, barmoq izi skaneriga ega bloknotni taqdim etgandi.
