Rossiyada retriver “Mir 24” kanali boshlovchisining mikrofonini o‘g‘irlab ketdi. Bir necha yil avval ham itlar telekanal efirini to‘xtatgan edi (video)

2021-yilning 1-aprel kuni Martin ismli oltinrang retriver “Mir 24” telekanali jurnalisti Nadejda Serejinkaning ishini to‘xtatib qo‘ydi, deb yozadi Meduza.

Boshlovchi jonli efir orqali Moskvada aprel oyining iliq ob-havosi haqida gapirayotgan edi. To‘satdan paydo bo‘lgan it bir sakrashda uning mikrofoniga tashlandi va o‘ljasini olgancha qochib ketdi. “To‘xta! Bu yerga kel! Hoy, to‘xta, to‘xta!” – deya baqirgan ta’qibga shoshilgan Serejinka. Shundan so‘ng jurnalist bilan aloqa to‘xtatildi.

Keyinroq Serejinka efirga qaytdi, faqat u bir o‘zi emas, balki mikrofon o‘g‘risi bilan edi. Retriver jurnalist yonidan joy oldi va kameraga qarab, ayyorona jilmayib qo‘ydi. “Aytganimdek, ob-havo chindan ham juda zo‘r, itlar bilan sayr qilish uchun mos”, − deydi Serejinka Martinni silab. Garchi mikrofon biroz zarar ko‘rgan bo‘lsa-da, suratga olish guruhidan  hech kim jarohat olmagan (mikrofonda tish izlarini ko‘rish mumkin).

Aftidan, itlar “Mir 24” telekanali boshlovchilari bilan alohida munosabatda bo‘ladi. Martin – telekanal efirini to‘xtatishga harakat qilgan yagona it emas. Masalan, 2017-yilda studiyaga yugurib kirib kelgan it jonli efir jarayonida boshlovchi ijodiy guruhdan yordam so‘raguniga qadar sakragan, akillagan va hattoki stol ustigacha ko‘tarilgan. Ushbu jarayonda boshlovchi kuchuklarni yaxshi ko‘rishini ham ta’kidlab o‘tgan.