Buyuk Britaniya shahzodasi Garrining rafiqasi Megan Markl amerikalik teleboshlovchi Opra Uinfriga bergan intervyusida u qirollik oilasida yashagan vaqtlari uydan chiqmaganini aytib, yolg‘on gapirdi. Bu haqda malika Diananing biografi Endryu Mortonga tayanib,“Izvestiya” xabar berdi.
Markl amerikalik teleboshlovchiga bergan intervyusida eri bilan yashagan saroyni to‘rt oy ichida atigi ikki marta tark etganini aytgandi. Bundan tashqari, uning pasporti va haydovchilik guvohnomasi olib qo‘yilganini ta’kidlagan.
“Opraga uydan chiqmaganini aytgan Megan Markl qirol oilasi bilan birga yashagan davrda odatiy hayot kechirgan va restoranlarda do‘stlari bilan ko‘rishgan”, — dedi Morton Daily Mail nashriga.
Morton ushbu juftlikning bir necha bor chet elga sayohat qilgani, bundan tashqari, 2019-yilda Markl o‘zining tug‘ilgan kunini nishonlash uchun Nyu-Yorkka shaxsiy samolyotda uchib ketganini eslab o‘tdi.
Biograf, shuningdek, do‘stlari Britaniya shahzodasining xotinini supermarketdan oziq-ovqat paketlari bilan chiqib, Kensington saroyiga ketayotganini shaxsan ko‘rganini ta’kidladi.
14-mart kuni Bukingem saroyi vakillari shahzoda Garrining rafiqasi Megan Marklning xatti-harakatlari bo‘yicha qirollik saroyi xizmatchilarining shikoyatlarini tekshirish uchun uchinchi tomon yuridik firmasini jalb qilgani ma’lum qilingandi.
11-mart kuni shahzoda Uilyam ukasining rafiqasi Megan Marklning intervyusiga munosabat bildirib, qirol oilasida irqchilik yo‘qligini ta’kidladi.
Eslatib o‘tamiz, mart boshida Britaniya shahzodasi Garri va uning rafiqasi Megan Markl amerikalik mashhur teleboshlovchi Opra Uinfriga bergan intervyusi e’lon qilingandi. Markl intervyuda qirollik oilasining ayrim a’zolari uning birinchi farzandi tug‘ilmasdan avval bolaning terisi rangidan tashvishlangani va Megan ruhiy tushkunlikka tushgan paytda mutaxassislarga murojaat qilishiga yo‘l qo‘ymaganini aytgan (go‘yoki bu qirollik obro‘siga putur yetkazadi). 2020-yilda qirollik unvonlari va majburiyatlaridan omma oldida voz kechib, AQShga ko‘chib o‘tgan juftlik intervyu mobaynida bir qator e’tiborga molik bayonot va boshqa masalalar qatorida Britaniya monarxiyasining parda ortidagi hayotidan ba’zi sirlarni ochib berdi.
Shahzoda Garri va rafiqasi Marklning intervyusidan keyin shov-shuv ko‘tarilib, ayni kunlarda butun dunyoda muhokama qilinmoqda. Avval Britaniya qirollik oilasi Megan Marklning irqchilik masalasi haqidagi bayonotini o‘rganib chiqishga va’da bergandi. Yelizaveta II esa nabirasining intervyusiga baho berish uchun biroz vaqt kerakligini aytgan.
Izoh (0)