Jizzaxda IIB xodimi o‘z ko‘kragiga o‘q uzib vafot etgani ma’lum qilindi

Jizzaxda IIB xodimining o‘z ko‘kragiga o‘q uzib, vafot etgani haqida “Huquq va iste’molchi” gazetasida chop etilgan maqola yuzasidan viloyat prokuraturasi rasmiy bayonot berdi.

Qayd etilishicha, voqea 2020-yil 29-avgust kuni soat, taxminan, 09:40 larda yuz bergan. Do‘stlik tuman IIB ma’muriy binosining nazorat o‘tkazish punktida xizmatga jalb qilingan tuman IIB xodimi bo‘lgan marhum Sh.B. o‘ziga biriktirilgan “Makarov” nomli 7230-raqamli jangovar qurol bilan ko‘krak qismiga bir marotaba o‘q uzib, tan jarohati olgan.

Shu sababli u tuman tibbiyot birlashmasi jonlantirish bo‘limiga yotqizilgan. Ammo tuman tibbiyot birlashmasi xodimlari tomonidan ko‘rsatilgan tez tibbiy yordamlarga qaramasdan, soat 10:30 larda vafot etgan.

“Holat yuzasidan tergov harakatlari davom etmoqda”, — deyiladi prokuratura xabarida.