Professional boksning super yengil vazn toifasida (-63,5 kg) ringga chiqayotgan o‘zbekistonlik Shahram G‘iyosov (11-0, 9 KO) 3-aprel kuni Toshkentdagi Humo Arena’da bo‘lib o‘tgan boks kechasida o‘zining navbatdagi jangini o‘tkazdi.
G‘iyosovga meksikalik Patrisio Lopes Moreno (28-5, 20 KO) raqib bo‘ldi.
Dastlabki raund ikkala bokschining faolligida o‘tdi, kichik ustunlik G‘iyosov tomonida bo‘ldi. Ikkinchi raund so‘ngida meksikalik sportchi nokdaun holatiga tushdi. Uchinchi raundda G‘iyosov raqib tanasiga kuchli zarba yo‘llab, uni nokautga uchratdi.
Bu g‘alaba orqali G‘iyosov WBA International kamarini yana bir bor himoya qila oldi.
G‘iyosov bundan avvalgi jangini 2020-yilning avgustida Uiston Kamposga qarshi o‘tkazgan va uni uchinchi raunddayoq nokautga uchratgandi.
Mazkur boks oqshomida Iqboljon Xoldorov professional ringdagi debyut jangida tanzaniyalik raqibini nokautga uchratdi, Sanjar Tursunov ukrainalik bokschini mag‘lub etdi, Hasanboy Do‘stmatov nokaut bilan g‘alaba qozonib, WBA International kamariga ega chiqdi. Bahodir Jalolov latviyalik bokschini muddatidan avval taslim etdi, Mirazizbek Mirzaxalilov debyut jangini 1-raunddagi nokautli g‘alaba bilan yakunladi, Isroil Madrimov 10 raund davom etgan bahsda yengilmas sportchini yengdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)