AQShning Jorjiya shtatidagi mahalliy avtoservisning Andreas Flaten ismli xodimi bir necha oy oldin ishdan bo‘shagan. O‘tgan vaqt davomida sobiq xodim ish beruvchidan so‘nggi maoshni olishga uringan. Natijada rahbar erkakning uyiga yopishqoq suyuqlik surtilgan 200 kilogramm tangani olib kelgan, deb xabar beradi Motor.

Foto: Instagram / Olivia Oxley

Xodimning ishdan bo‘shatilishiga uning ish joyidan belgilangan vaqtdan erta ketib qolaverishi sabab bo‘lgan. Biroq Andreas Flatenning so‘zlariga ko‘ra, u suhbat davomida bolasini bog‘chadan olib ketish uchun ishini soat 17:00 da tugatishi lozimligini aytgan. Avtoservis rahbariyati ushbu shartga rozi bo‘lgan, biroq keyinroq o‘zini buni unutib qo‘ygandek tutgan.

So‘nggi bir necha oy davomida Andreas oxirgi bir haftalik maoshi — 915 dollarni olishga uringan. Vaziyatni hal etish uchun erkak AQSh Mehnat vazirligiga murojaat qilgan va tashkilot ish beruvchining zimmasiga sobiq xodimdan qarzdorligini to‘lash majburiyatini yuklagan. Avtoservis rahbari qarzni qaytargan, biroq maosh sifatida qurilish aravachasida bir sentli 200 kilogramm tanga olib kelib, Andreasning uyi oldiga to‘kib ketgan.

Andreas ayoli bilan birga mashina moyiga o‘xshash yopishqoq suyuqlik sepilgan 91,5 ming dona tangani uyiga olib kirgan. Erkakning so‘zlariga ko‘ra, bu kabi tangalarni biror bir bank yoki ichimliklar sotuvchi avtomat qabul qilmaydi. Besh dollarni yuvish vositalari yordamida tozalash uchun ikki soatga yaqin vaqt talab etiladi. Tangalarning barchasini tozalashga qancha vaqt sarflanishini tasavvur qilish qiyin. Avtoservis egasining ma’lum qilishicha, sobiq xodimga maoshning qanday to‘langani ahamiyatsiz, muhimi unga to‘lab berilganida.