Argentina prezidenti Alberto Fernandesning koronavirusga topshirgan antigen testi musbat natija berdi, diagnozning tasdiqlanishi uchun u PZR-testining natijalarini kutyapti. Bu haqda siyosatchi o‘zining Twitter sahifasida xabar berdi, deb yozmoqda “Interfaks”.
Fernandesning so‘zlariga ko‘ra, 1-aprel kuni kechqurun uning biroz isitmasi ko‘tarilib, boshi og‘rigani uchun koronavirus antigenini tekshirishga qaror qilgan. Test natijasi musbat chiqqach, prezident o‘zini yakkalash tartibiga o‘tib, PZR-testining natijalarini kuta boshladi.
2-aprel kuni Fernandes o‘zining 62 yoshini qarshiladi. Uning ta’kidlashicha, u o‘zini yaxshi his qilyapti va koronavirusga topshirgan testi musbat natija bermaganida, tug‘ilgan kunini nishonlagan bo‘lar edi.
Yanvar oyida Fernandes koronavirusga qarshi Rossiyaning “Sputnik V” vaksinasi bilan emlangani haqida xabar bergan edi.
Avvalroq Portugaliya prezidenti Marselu Rebelu di Sozaning koronavirus infeksiyasiga topshirgan testi musbat natija ko‘rsatgani haqida xabar berilgandi. Shuningdek, Armaniston prezidenti Armen Sarkisyan oilasi bilan Yangi yil ta’tilini o‘tkazish paytida London shahrida koronavirus yuqtirib olgan. Prezident matbuot xizmati unda kasallik og‘ir kechganini ma’lum qilgan.
Bundan tashqari, Braziliya vitse-prezidenti, Fransiya prezidenti Emmanuel Makron, Shvetsiya shahzodasi Karl Filipp va malika Sofiyada hamda Ukraina prezidenti Vladimir Zelenskiyda koronavirus aniqlangan.
Eslatib o‘tamiz, AQShning sobiq prezidenti Donald Trampda 1-oktabr kuni koronavirus aniqlangandi. AQSh sobiq prezidenti bir necha kun kasalxonada davolangan va u yerdan 5-oktabr kuni chiqqan.
Izoh (0)