“Qozog‘iston—O‘zbekiston chegarasida yuzaga kelgan tirbandliklarga O‘zbekistonning aloqasi yo‘q” — Senat qo‘mitasi

O‘zbekiston Oliy Majlisi Senati Mudofaa va xavfsizlik masalalari qo‘mitasi Qoraqalpog‘iston Respublikasi bojxona boshqarmasi tasarrufidagi “Daut-ota” chegara bojxona postida yuzaga kelgan avtotransport vositalarining tirbandligiga oid holatni o‘rgandi. Bu haqda Senat axborot xizmati xabar berdi.

O‘rganish natijasida “Daut-ota” chegara bojxona posti orqali kirish va chiqish yo‘nalishida harakatlangan avtotransport vositalarining oqimi quyidagi omillar sabab ko‘paygani aniqlangan:

• pandemiya sharoitida Turkmanistonda karantin tadbirlarining kuchaytirilgani hamda Turkmaniston hududi orqali avtotransport vositalarining harakati cheklangani sababli avtotransport vositalari O‘zbekiston—Qozog‘iston—Rossiya—Gruziya—Turkiya yo‘nalishida harakatlanmoqda;
• qish mavsumida havo haroratining keskin pasayib ketishi natijasida Qozog‘istonning Aqto‘be viloyati Irgiz qishlog‘i orqali o‘tuvchi yo‘lning muzlashi, shuningdek, Rossiyaning janubiy viloyatlariga yukni yetkazib beruvchi tashuvchilar uchun “Daut-ota” chegara bojxona posti orqali harakatlanish qulay bo‘lmoqda (masofaning qisqaligi va yo‘l xarajatlarining kamligi);
• O‘zbekiston bilan Turkiya davlati o‘rtasida imzolangan kelishuvga asosan, tashqi savdo yuklarini tashuvchi tomonlar avtotransport vositalari uchun qulaylik va yengilliklar yaratilgani sababli Turkiya davlati hududi orqali O‘zbekiston tashuvchilarining harakatlanishi ko‘paygan.

Ta’kidlanishicha, O‘zbekiston hududiga kirib kelayotgan avtotransport vositalari bojxona postida belgilangan muddatlarda bojxona ko‘rigidan o‘tkazilmoqda.

O‘z navbatida, o‘zbek—qozoq davlat chegarasida yuzaga kelayotgan tirbandlikni bartaraf etish maqsadida Qozog‘iston tomoni bilan Davlat bojxona qo‘mitasi rahbariyati darajasida har hafta, mas’ul boshqarmalari darajasida har kuni, bojxona posti darajasida har ikki soatda muloqot qilinib, bir-biriga ko‘maklashgan holda tezkorlik bilan mavjud muammolar yechimi topilmoqda.

Senatning Mudofaa va xavfsizlik masalalari qo‘mitasi o‘zbek—qozoq davlat chegarasida yuzaga kelayotgan tirbandlikni bartaraf etish bo‘yicha olib borilayotgan ishlarni nazoratga olgan.

Avvalroq IIV YHXBB Chinozdan o‘tgan avtomobil yo‘lida yuzaga kelayotgan tirbandliklar bo‘yicha ma’lumot berib, M-39 avtomobil yo‘lining 862-kilometrida joylashgan yo‘l o‘tkazgich ko‘prikda ta’mirlash ishlari olib borilayotgani ma’lum qilgandi.