Checheniston rahbari Ramzan Qodirov tinchlik bo‘yicha Nobel mukofotiga nomzod sifatida ko‘rsatildi. Bu haqda Xalqaro Nobel axborot markazi (XNAM) prezidenti Vyacheslav Tyutyunnik xabar berdi, deb yozmoqda “Kommersant”.
Uning so‘zlariga ko‘ra, Nobel qo‘mitasiga ariza Norvegiya vakillari tomonidan yuborilishi mumkin. Hech qanday aniq ismlar yoki tashkilotlar nomi keltirilmagan.
XNAMga 1987-yilda asos solingan bo‘lib, bosh qarorgohi Tambov shahrida joylashgan. Moskva, Peterburg, Boku, Vena, Gamburg shaharlarida filiallari mavjud. Markaz Nobel sulolasi fenomeni bo‘yicha tadqiqotlar olib boradi va xalqaro uchrashuvlarni tashkil qiladi.
Tyutyunnikning xabar berishicha, Ramzan Qodirov “so‘nggi 15 yil ichida tarixiy jihatdan murakkab bo‘lgan Checheniston mintaqasida muntazam tinchlik o‘rnatish va uni saqlashga qo‘shgan ulkan hissasi uchun” mukofotga nomzod qilib ko‘rsatildi.
Nobel jamg‘armasi nizomiga ko‘ra, nomzodlar turli mamlakat parlamentlari va hukumatlarining a’zolari, xalqaro sudlarning a’zolari, universitet rektorlari, ijtimoiy fanlar, tarix, falsafa, huquq va dinshunoslik professorlari, tinchlik va tashqi siyosat bo‘yicha ilmiy-tadqiqot institutlarining direktorlari, tinchlik bo‘yicha Nobel mukofoti sovrindorlari, Norvegiya Nobel qo‘mitasi a’zolari va maslahatchilari tomonidan ko‘rsatilishi mumkin.
Avvalroq Norvegiya parlamenti a’zosi Petter Eyde Black Lives Matter (BLM) harakatini 2021-yilgi tinchlik bo‘yicha Nobel mukofotiga nomzod sifatida ilgari surdi. Parlamentariy o‘zining bu kabi qarorini BLM’ning tizimli o‘zgartirishlarga bog‘liq chaqiriqlari butun dunyo bo‘ylab tarqalgani bilan izohlagan. Mukofotga ilgari surish arizasida Eyde BLM AQShdan boshqa mamlakatlarni ham irqchilikka qarshi kurashishga da’vat etganini ta’kidlagan.
Shuningdek, Isroil bosh vaziri Binyamin Netanyaxu hamda Abu-Dabi valiahd shahzodasi Muhammad ibn Zayd al-Nahayon Britaniya lordlar palatasi a’zosi Uilyam Devid Trimbl tomonidan Tinchlik bo‘yicha beriladigan Nobel mukofotiga nomzodlar sifatida ko‘rsatildi. Davlatlar rahbarlari o‘zaro tinchlik shartnomasini imzolagani tufayli mukofotga nomzod sifatida qayd etilgan. Ikki davlat o‘rtasidagi kelishuv Isroil va arab mamlakatlari o‘rtasidagi munosabatlarning me’yorlashuviga xizmat qilgan.
Bundan tashqari, AQSh sobiq prezidenti Donald Trampning kuyovi va maslahatchisi Jared Kushner o‘z o‘rinbosari Avi Berkovits bilan birgalikda tinchlik uchun Nobel mukofotini olish uchun nomzodlar qatoriga kirdi. Kushnerning nomzodlar qatoriga kirishiga Isroil hamda arab davlatlari o‘rtasidagi “Ibrohim kelishuvlari”ni imzolashda ishtirok etgani sabab bo‘lgan.
Izoh (0)