Buyuk Britaniyada shvetsiyalik ekofaol Greta Tunbergning haykali o‘rnatildi. Bu haqda Daily Mail nashri xabar berdi.
18 yoshli Tunbergning bronza haykali Angliyaning janubi-sharqida joylashgan Vinchester universiteti hududiga o‘rnatildi.
Haykalni o‘rnatish uchun ta’lim muassasasi 24 ming funt sterling (taxminan, 33 ming dollar) sarfladi.
Nashrning yozishicha, universitet ma’muriyatining bunday qaroridan talabalarning barchasi ham xursand emas. Talabalar kengashi raisi Megan Bollning so‘zlariga ko‘ra, bu mablag‘larni koronavirus pandemiyasi sababli onlayn o‘qishga majbur bo‘lgan talabalarni qo‘llab-quvvatlashga sarflash maqbulroq bo‘lardi.
https://twitter.com/zsk/status/1376925165183975426
“Biz universitet rahbariyatini talabalarga qo‘shimcha yordam ko‘rsatish uchun haykalga sarflangan mablag‘ga teng miqdorda yordam ajratishga chaqiramiz”, — dedi u.
Shu o‘rinda, universitet ma’muriyati haykal o‘rnatish uchun talabalar va ta’lim muassasasi xodimlarini qo‘llab-quvvatlash jamg‘armasidan mablag‘ sarflanmaganini ta’kidladi.
Avvalroq iqlim o‘zgarishini og‘ir o‘tkazadigan shilliqurtning yangi turiga Greta Tunberg nomi berilgan edi.
Shuningdek, Sankt-Peterburgning Petrograd okrugidan o‘tuvchi Karpovka daryosi bo‘yida ham COVID-19 pandemiyasi davrida vafot etgan tibbiyot xodimlarining xotirasiga bag‘ishlangan yodgorlik ochildi. Bu yerga “G‘amgin farishta” deb nomlangan bronza haykal o‘rnatilgan. Asar muallifi Sankt-Peterburg fuqarosi, rassom Roman Shustrov bo‘lib, u 2020-yil 14-mayda koronavirus oqibatida vafot etgan.
London markazidagi Lester-skver maydonida esa britaniyalik yozuvchi Joanna Rouling qalamiga mansub asar qahramoni Garri Potterning haykali o‘rnatildi. Ma’lum qilinishicha, mazkur skulptura so‘nggi yuz yillikdagi eng mashhur filmlarni qayd qilish maqsadida tashkil qilingan “Maydondagi manzaralar” loyihasi doirasida o‘rnatilgan. Loyiha 2023-yilga qadar davom etadi.
Izoh (0)