Farg‘onada xonadonlarning biriga bostirib kirib, er-xotinga hujum qilgan shaxslar hodisa joyida qoldirib ketilgan kurtka sabab topildi
Farg‘ona viloyati Toshloq tumanida xonadonlarning biriga bostirib kirib, er-xotinga hujum qilgan shaxslar topilib, qo‘lga olindi, deya xabar bermoqda Tergov departamenti.
Ma’lum qilinishicha, 2021-yilning 27-mart kuni soat 02:30 larda ikki nafar noma’lum shaxs Toshloq tumani “Katta ko‘cha” mahallasida yashovchi 38 yoshli K.U.ning xonadoniga yuzlariga niqob taqqan holda g‘ayriqonuniy ravishda kirgan. Bosqinchilar xonadon egasi va uning turmush o‘rtog‘i 34 yoshli Sh.U.ga hujum qilgan vaqtlarida K.U. ularning birini ushlab olgan. Shu vaqtda ikkinchi noma’lum shaxs oshxona pichog‘ini olib, uning bosh, chap kurak va chap biqin sohalariga jarohat yetkazib, hodisa joyidan yashiringan.
Mazkur holat yuzasidan Toshloq tumani IIB huzuridagi tergov bo‘limi tomonidan Jinoyat kodeksining 164-moddasi 3-qismi “v” bandi (uy-joyga g‘ayriqonuniy ravishda kirgan holda bosqinchilik qilish) bilan jinoyat ishi qo‘zg‘atilgan.
Hodisa joyi ko‘zdan kechirilganda noma’lum shaxslarning biriga tegishli erkaklar kurtkasi va finka pichog‘i ashyoviy dalil tariqasida rasmiylashtirib olingan.
Olib borilgan tezkor qidiruv harakatlari davomida hodisa joyidan olingan erkaklar kurtkasi 27 yoshli A.Q.ga tegishli ekanligi aniqlanib, uning vaqtincha yashash joyi tintuv qilinganda niqob sifatida foydalanilgan ayollar kolgotkasi, qaychi, skotch o‘rami va kolgotka paketlari ashyoviy dalil tariqasida rasmiylashtirib olinib, A.Q.ning o‘zi va jinoiy sherigi 23 yoshli J.O‘. ushlangan.
Hozirda tergov harakatlari olib borilmoqda.
Bundan avval Zangiotada uxlab yotgan er-xotinga o‘roq bilan jarohat yetkazib, xonadondan mashina va boshqa buyumlarni o‘g‘irlab ketgan shaxs ushlangani, Namanganda Xitoy fuqarolariga nisbatan bosqinchilik sodir etib, ularning qariyb 20 ming dollar pulini qo‘lga kiritgan shaxslar qo‘lga olingani hamda Zangiotada 19 yoshli qizni kimsasiz joyga olib borib, uni tirnoq oluvchi “kusachka” bilan qo‘rqitib, telefon va taqinchoqlarini o‘margan haydovchi ushlangani haqida xabar berilgandi.
