Namangandagi “Markaziy” stadionida bo‘lib o‘tgan O‘zbekiston va Gana B (zaxira) milliy terma jamoalari o‘rtasidagi o‘rtoqlik o‘yinini (2:1) 20 877 nafar futbol ishqibozi kuzatdi. Bu haqda “Daryo” muxbiri Azizbek Abduvaliyev xabar bermoqda.
“Navbahor” futbol klubi matbuot xizmatiga ko‘ra mazkur o‘yinni tomosha qilish uchun Namanganga Toshkent shahri va viloyatlar, hatto qo‘shni Qirg‘izistondan ham muxlislar kelgan.
O‘yin yakunlangandan so‘ng mahalliy nashrlarda Namangan viloyati hokimi, viloyat futbol assotsiatsiyasi prezidenti Shavkatjon Abdurazzoqovning bugungi bahs haqidagi fikrlari e’lon qilindi.
Bugun millionlar o‘yinining ashaddiy va fidoyi muxlislariga ega bo‘lgan Namanganda katta bayram, katta futbol tantanasi bo‘lib o‘tdi. Viloyatimiz futbolidagi tarixiy voqea guvohiga aylandik. Ya’ni, futbol bo‘yicha O‘zbekiston milliy terma jamoasi ishtirokidagi o‘rtoqlik o‘yini ilk marta Namanganda o‘tkazildi. 2022-yilgi Jahon Chempionati saralash bosqich bahslariga qizg‘in tayyorgarlik ko‘rayotgan mamlakatimiz bosh jamoasi ishtirokidagi o‘yinlar har doim muxlislar diqqat markazida turadi, uni jiddiy qiziqish bilan kuzatamiz. Shuni inobatga olgan holda, bugungi o‘yin nafaqat namanganlik, balki butun vodiylik muxlislar uchun o‘ziga xos sovg‘a bo‘ldi deyish mumkin.Quyida Namanganda bo‘lib o‘tgan o‘yindan olingan suratlar to‘plami havola etiladi.Shavkatjon Abdurazzoqov, Namangan viloyati hokimi
Eslatib o‘tamiz, O‘zbekiston 29-mart kuni Iroq terma jamoasiga qarshi Toshkentda o‘rtoqlik o‘yini o‘tkazadi.
Izoh (0)