Kanadalik zamonaviy rassom Krista Kim dunyoda birinchi bo‘lib raqamli uyni kimoshdi savdosiga qo‘ydi, deb yozadi Esquire.
Mars House deb nomlangan virtual uy 288 efirga sotilgan. Bu, taxminan, 530 ming dollarni tashkil etadi. Uy bilan birga Krista xaridorga faylga egalik huquqini tasdiqlovchi NFT ham bergan. Kristaning so‘zlariga ko‘ra, mulkning yangi egasi uyni yaxshiroq tushunishi uchun faylni maxsus virtual yoki kengaytirilgan dasturlarga yuklashi mumkin.
Rassom koronavirus pandemiyasining birinchi to‘lqini vaqtida ushbu uyni loyihalashtirgan. Uy qizil sayyora bezaklari va minimalizm ruhida − shaffof devor, futuristik mebellar va suzish havzasi bilan boyitilgan.
“Men ushbu makon meditatsion dizaynga bo‘lgan ishtiyoqimni, raqamli davr uchun avangard hashamatning yangi ko‘rinishini namoyish etishini istayman”, − deydi rassom. Shuningdek, Krista bu uylar odamlarning kundalik hayotining bir qismiga aylanishiga ishonadi. U mazkur uy loyihasini “NFT san’atning keyingi avlodi” deb atagan.
Izoh (0)