Xalq demokratik partiyasi Markaziy Kengashi ijroiya qo‘mitasi hay’atining tegishli qarori qabul qilindi — saylovga tayyorgarlik jarayonlari boshladi, deb xabar bermoqda XDP matbuot xizmati.
Unga ko‘ra, O‘zbekiston Prezidenti saylovida ishtirok etish uchun Xalq demokratik partiyasi tomonidan ko‘rsatiladigan nomzodning saylovoldi dasturini ishlab chiqish bo‘yicha ishchi guruh tuzildi.
Dasturda bir qator dolzarb ijtimoiy masalalarda takliflarni ilgari surish mo‘ljallanmoqda. Buning uchun partiyaning 44 banddan iborat chora-tadbirlar dasturi tasdiqlandi.
Xabarda ta’kidlanishicha, saylovoldi dasturi loyihasini tayyorlashda ilmiy doiralar va partiya a’zolari, keng jamoatchilik vakillari bilan ochiq muloqot va muhokamalar o‘tkazish, aholini o‘ylantirayotgan, yechimini kutib turgan masalalarni hal qilish bo‘yicha yangicha yondashuvlar hamda takliflarni o‘rganishga alohida e’tibor qaratiladi.
XDP Markaziy Kengashi raisi, Oliy Majlis Qonunchilik palatasidagi fraksiyasi rahbari Ulug‘bek Inoyatov 20-mart kuni Samarqand viloyatida, o‘tgan haftada Surxondaryo va Toshkent viloyatlarida shu masala bo‘yicha dastlabki muloqotlarni o‘tkazdi.
“Partiya dasturi kabinetda o‘tirib yozilishi kerak emas. U odamlar, partiya a’zolarining takliflari asosida shakllantirilganda hayotiy bo‘ladi, xalqimiz manfaatlariga xizmat qiladi. Xalq demokratik partiyasi o‘z elektorati, jamoatchilik vakillari ishtirokida, respublika bo‘ylab ochiq muloqot va muhokamalarni tashkil etadi”, — deyiladi matbuot xizmati xabarida.
Eslatib o‘tamiz, O‘zbekistonda Prezident saylovlari dekabr oyidan oktabrga ko‘chirilgan. Saylov muddatlari ko‘chirilishi yuzasidan Oliy Majlis Qonunchilik palatasi izoh bergandi. Respublikada prezident sayloviga tayyorgarlik 2021-yil 1-martdan boshlanishi ma’lum qilingan.
Izoh (0)