Vengriya Sog‘liqni saqlash xizmati 17-martda bir kun davomida koronavirusdan vafot etgan 195 nafar bemor haqida xabar berdi. Bu ko‘rsatkich mamlakat uchun pandemiya boshidan beri antirekord hisoblanadi. Bu haqda Associated Press nashriga tayanib “Interfaks” xabar berdi.
Shuningdek, avvalgi antirekord (193 ta o‘lim holati) 2020-yil dekabr oyi boshlarida qayd etilgan.
Koronavirusdan davolanayotganlarning soni ham 10,3 mingga yetib, rekord darajaga chiqdi. Bu ko‘rsatkich Vengriyada kasallikning yangi xuruji boshlanganda, fevral oyi boshida koronavirus bilan shifoxonaga yotqizilganlar sonidan uch barobar ko‘p.
Amerikaning Jons Hopkins universiteti ma’lumotlariga ko‘ra, Vengriya COVID-19 yuqtirganlar orasida o‘lim darajasi bo‘yicha dunyoda yettinchi o‘rinda turibdi.
Associated Press’ning ma’lum qilishicha, Vengriya COVID-19’ga qarshi ommaviy emlash bo‘yicha Yevropa Ittifoqi mamlakatlari orasida Maltadan keyin ikkinchi o‘rinda turadi. Mamlakatda 1,4 million aholi vaksinaning bitta dozasini olib bo‘lgan.
Vengriyaga Xitoyning 100 ming dozada Sinopharm vaksinasidan yana bir partiya kelishi kutilmoqda. Mamlakat — Yevropa Ittifoqida ushbu vaksinadan foydalanayotgan yagona davlat.
Vengriyada koronavirusga qarshi beshta vaksina ma’qullangan. Fevral oyida ushbu mamlakat Yevropa Ittifoqida birinchi bo‘lib Rossiyaning “Sputnik V” vaksinasidan va Sinopharm preparatidan foydalanishni boshladi.
Ma’lumot uchun, Kombojada 11-mart kuni pandemiya boshlanganidan buyon koronavirus bilan bog‘liq birinchi o‘lim holati qayd etilgani haqida xabar berildi. Marhum Sianukvil qirg‘og‘ida ishlaydigan 50 yoshli haydovchi bo‘lgan. Fevral oyida unda koronavirus aniqlangan, 11-mart kuni tongda kasalxonada vafot etgan.
Pandemiya boshidan to 16-mart, seshanba kuniga qadar butun dunyoda koronavirus bilan kasallanish bo‘yicha 120 217 175 ta holat qayd etildi. Universitet ma’lumotlariga ko‘ra, dunyo bo‘ylab COVID-19 bilan kasallanish oqibatidagi o‘limlar soni 2 660 456 taga yetgan, 96 milliondan ortiq bemor kasallikdan tuzalgan.
Izoh (0)