Prezident Shavkat Mirziyoyev Yuqori Chirchiq tumanidagi “Yevro Global Invest” mas’uliyati cheklangan jamiyati faoliyati bilan tanishdi.

Qayd etilishicha, 2020-yili dekabrda ish boshlagan “Yevro Global Invest” korxonasi yirik yig‘ma temirbeton panellari tayyorlashga ixtisoslashgan. Mazkur loyihaning umumiy qiymati 40 million yevro. 7 gektarlik ishlab chiqarish maydoniga Italiya, Germaniya va Avstriyadan zamonaviy liniyalar keltirib o‘rnatilgan.

Korxona mahsulotlari jahon standartlariga mos, zilzilabardoshligi yuqori. Mazkur qurilish materiallari ishlatilgan uylar tannarxi boshqalarga nisbatan 30 foiz arzon bo‘ladi. Mahsulotlar rangli qilib tayyorlanishi ham mumkin.

Klaster usulidagi korxona yiliga 500 ming kub metr beton mahsulotlari ishlab chiqarish, 1 million tonna tosh maydalash, yana shuncha asfalt tayyorlash quvvatiga ega. Bu yerda, shuningdek, ichki va tashqi eshiklar, deraza romlari, mebellar ham yasalmoqda.

Davlat rahbari materiallar ishlab chiqarish va qurilishning to‘liq “zanjiri”ni tashkil etib, uy-joylar narxini yanada arzonlashtirish, ko‘proq yoshlarni ishga jalb etish zarurligini ta’kidladi.

Ayni paytda 850 nafar ishchi mehnat qiladi. Yil yakunigacha ish o‘rinlarini 1 ming 500 taga yetkazish rejalashtirilgan.

Shu yerda 2021—2022-yillarda Toshkent viloyatida amalga oshiriladigan investitsiya loyihalari taqdimoti o‘tkazildi.

Bundan avval Shavkat Mirziyoyev Chirchiqqa tashrifi chog‘ida “Iftixor” mahallasi aholisi bilan suhbatlashgani, sholi yetishtirib, uni qayta ishlaydigan TST Rice korxonasi bilan tanishgani hamda “Shovvozsoy” haqidagi gap-so‘zlarga munosabat bildirgani haqida xabar berilgandi.