Qashqadaryo viloyatining Dehqonobod tumanida yashovchi fuqaro otasidan qolgan ov qurolini o‘z ixtiyori bilan tuman IIBga topshirdi. Bu haqda “Daryo”ga tuman IIB boshlig‘i o‘rinbosari Dilshod Mirzayev ma’lum qildi.
Ma’lum bo‘lishicha, 2021-yilning 17-mart kuni 1987-yil Dehqonobod tumanining “Oqrabot” mahallasi, Temirali qishlog‘ida tug‘ilgan Jalil To‘xtayev molxonasi devoridan otasi Qurbon To‘xtayevdan qolgan ov qurolini topib olganini aytib, tuman IIBga murojaat qilgan.
“‘Oqrabot’ mahallasining Temirali qishlog‘ida yashovchi 34 yoshli fuqaro o‘z molxonasini buzib olayotgan paytda molxona devorlari orasidan otasidan qolgan 1956-yilda ishlab chiqarilgan 1 nilli, 16 kalibrli o‘qotar ov qurolini topib olganini ma’lum qilib, o‘z ixtiyori bilan tuman IIBga topshirdi. Ov quroli tuman IIBda rasmiylashtirib olindi”, — deydi Dilshod Mirzayev.
Eslatib o‘tamiz, Jinoyat kodeksining 248-moddasiga muvofiq qurolni, patronlarni, o‘q-dorilarni, portlovchi moddalarni va portlatish qurilmalarini o‘z ixtiyori bilan topshirgan jismoniy va yuridik shaxs qonun hujjatlarida belgilangan javobgarlikdan ozod qilinadi.
Shuningdek, Vazirlar Mahkamasining “Ro‘yxatga olinmagan qurolni, patronlarni, o‘q-dorilarni, portlovchi moddalarni va portlatish qurilmalarini ichki ishlar organlariga o‘z ixtiyori bilan topshirish tartibi to‘g‘risidagi nizomni tasdiqlash haqida”gi qaroriga ko‘ra, jismoniy yoki yuridik shaxs ichki ishlar organlariga qurol va (yoki) ularning o‘q-dorilarini o‘z ixtiyori bilan topshirganligi uchun pul mukofoti bilan taqdirlanishi, 1974-yilgacha ishlab chiqarilgan fuqaroviy o‘qotar qurol topshirgan jismoniy shaxs esa uni imtiyozli olish huquqiga ega bo‘lishi mumkin.
Izoh (0)