Oliy Majlis Qonunchilik palatasining Korrupsiyaga qarshi kurashish va sud-huquq masalalari qo‘mitasi a’zosi O‘rinboyev Avaz Rustamovich Farg‘ona viloyati hokimining birinchi o‘rinbosari etib tayinlandi, deya xabar berdi “Daryo” muxbiri Azizjon Ermatov.
Ma’lum bo‘lishicha, Avaz O‘rinboyev Farg‘ona politexnika instituti hamda O‘zbekiston Respublikasi Bank-moliya akademiyasini tamomlagan.
U 1996-yilda “O‘ztadbirkorbank” Oltiariq tuman bo‘limida o‘z mehnat faoliyatini boshlagan bo‘lib, 1999-yildan 2005-yilgacha “Asaka” bankning Oltiariq tuman bo‘limida, 2005—2011-yillarda Markaziy bankning Farg‘ona viloyat bosh boshqarmasida faoliyat olib borgan. 2011—2012-yillarda Tashqi iqtisodiy faoliyat Milliy bankining Qo‘qon filialini, 2012—2015-yillarda Farg‘ona viloyati bo‘limini boshqargan.
2019-yilda 107-Rishton saylov okrugidan Oliy Majlis Qonunchilik palatasi deputati etib saylangan.
Eslatib o‘tamiz, Xayrullo Bozorovning sobiq birinchi o‘rinbosari Mirzohid Ubaydullayev 2021-yilning 9-fevral kuni Farg‘ona shahar hokimi etib tayinlangandi.