Gollivudning taniqli aktyori Mettyu Makkonaxi o‘zi tug‘ilgan Texas shtati gubernatorligiga nomzodini qo‘yish imkoniyatini “jiddiy ko‘rib chiqmoqda”, deb xabar beradi Esquire.
“Rahbarlik rolim qanday? Men chindan ham nimadir o‘rgatish va bo‘lishishga qodirman deb o‘ylayman. Hayotimning keyingi bobida qaysi toifadan o‘rin olaman?”, — deya Makkonaxidan iqtibos keltiradi Deadline.
Agarda aktyor chindan ham Texas gubernatorligiga nomzodini qo‘ysa, u shtatning amaldagi rahbari — qayta saylanish niyatida bo‘lgan respublikachi Greg Ebbot bilan kurashishi kerak bo‘ladi.
“Oskar” mukofoti sohibi bunga qadar ham gubernator bo‘lishi borasidagi niyatini ma’lum qilgan. Noyabr oyida Makkonaxi agarda Texas aholisi xohlasa bu kabi imkoniyatni rostdan ko‘rib chiqishi mumkinligini aytgandi. Shu bilan birga, u siyosatni “singan biznes” deb atagan va “o‘z taqdirining o‘zgarish” vaqtini kutayotganini ta’kidlagan.
The Guardian’ning ta’kidlashicha, aktyorning siyosiy mansubligi hozirgacha noma’lum. Makkonaxi odatda o‘tkir siyosiy mavzularga ehtiyot bo‘lib izoh bergani sabab, ijtimoiy tarmoqlarda uning respublikachilar yoki demokratlar tomonidan saylanishi mumkinligi muhokama qilinmoqda.
Eslatib o‘tamiz, Mettyu Makkonaxi 2019-yilda maktabni bitirganidan so‘ng oradan 31 yil o‘tib shahodatnoma olgandi.
Izoh (0)