Farg‘ona viloyatining Farg‘ona tumanida kommunal to‘lovlar uchun aholidan yig‘ilgan mablag‘larni talon-toroj qilgan shaxslarga jinoyat ishi qo‘zg‘atildi, deya xabar berdi “Daryo” muxbiri.
Ma’lum qilinishicha, Bosh prokuratura huzuridagi iqtisodiy jinoyatlarga qarshi kurashish departamentining Farg‘ona tuman bo‘limi tomonidan tergovga qadar tekshiruv o‘tkazilgan.
Tekshiruv davomida “Farg‘ona suv ta’minoti” MChJning Farg‘ona tumani bo‘limi sobiq rahbari O‘.T. va moddiy javobgar shaxslar aholidan ichimlik suvi va oqova xizmati uchun yig‘ilgan 108 million 500 ming so‘mlik kvitansiyalarni elektron bazaga kiritmagani, shuningdek, 2020-yil davomida bo‘lim muhri bilan tasdiqlangan to‘lov kvitansiyalari orqali yig‘ilgan 14 million 800 ming so‘mni o‘zlashtirish yo‘li bilan talon-toroj qilgani aniqlangan.
Mazkur holat yuzasidan O‘.T. va boshqalarga nisbatan Jinoyat kodeksining 167-moddasi (talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Mavzuga doir:
- Namanganda 1 mlrd so‘m imtiyozli kredit talon-toroj qilingani aniqlandi
- Toshkent viloyatida aholini ichimlik suvi bilan ta’minlash uchun ajratilgan puldan 722 mln so‘m talon-toroj qilindi
- Yunusobodda kommunal to‘lovlar uchun aholidan yig‘ilgan 288 mln so‘mni o‘zlashtirib yuborgan shaxslarga jinoyat ishi qo‘zg‘atildi
Izoh (0)