Netflix platformasi “Xarobadan chiqqan millioner” filmidagi roli orqali tanilgan aktyor Dev Patelning rejissor sifatida ishlagan ilk filmini namoyish etish uchun 30 million dollarlik bitimni imzoladi, deb xabar beradi “Film.ru”.
Filmni suratga olish ishlari yaqindagina yakunlangan bo‘lib, Patel unda bosh rolni ijro etgan. Kartina “Maymun odam” nomini olgan.
Film sujeti markazida yolg‘on ayblov bilan qamalib, endigina ozodlikka chiqqan qahramon o‘rin olgan. Endilikda uning asosiy maqsadi — bir necha yil oldin uning barcha narsasini tortib olgan shaxslardan qasos olish.
Kartinaning qoralama variantini ko‘rgan ayrimlarning so‘zlariga ko‘ra, kartinani “Mumbaylik Jon Uik” deb atash mumkin. Patelning o‘zi esa hindlarning Xanuman — yarim odam, yarim maymun haqidagi qadimiy afsonalaridan ilhomlangan.
Shuningdek, filmda “Rayon №9” orqali mashhurlikka erishgan Sharlto Kopli ham suratga tushgan. Taxminlarga ko‘ra, striming servisda film relizi 2022-yilda paydo bo‘ladi.
Izoh (0)