Farg‘onada noqonuniy nikoh o‘qiganiga chora ko‘rmaslik uchun profilaktika inspektoriga 2 mln so‘m pora taklif qilgan shaxs ushlandi

Farg‘ona viloyatining Quva tumanida profilaktika inspektoriga pora bermoqchi bo‘lgan shaxs ushlandi, deb xabar bermoqda viloyat IIB matbuot xizmati.

Ma’lum qilinishicha, 4-mart kuni fuqaro S.Z. Quva tumani IIB profilaktika inspektori T.Z.ga murojaat qilib, noqonuniy ravishda shar’iy nikoh o‘qiganligi sababli o‘ziga nisbatan to‘plangan hujjatlar yuzasidan chora ko‘rmaslik evaziga 2 million so‘m miqdoridagi pullarni pora tariqasida taklif qilgan.

Inspektor S.Z.ni pora berish jinoyat ekanligi va javobgarlikka tortilishi haqida bir necha marotaba ogohlantirib, bu yo‘ldan qaytarishga harakat qilinishiga qaramay, fuqaro pora taklif qilishda davom etgan.

Holat yuzasidan IIV O‘XB Farg‘ona viloyati bo‘yicha bo‘limi hamda Bosh prokuraturi huzuridagi iqtisodiy jinoyatlarga qarshi kurashish departamenti va Quva tumani IIB xodimlari bilan hamkorlikda o‘tkazilgan tezkor tadbir davomida S.Z. Quva tumani IIB profilaktika inspektori T.Z.ning xizmat xonasida kelishilgan pullardan 1 million 200 ming so‘mni pora tariqasida bergan vaqtida ushlangan. Pullar xolislar ishtirokida daliliy ashyo tariqasida rasmiylashtirib olingan.

Holat yuzasidan tegishli tartibda protsessual hujjatlar rasmiylashtirilib, Quva tumani prokuraturasiga yuborilgan.