BMT bosh kotib Antoniu Guterrish shoshilinch choralar ko‘rilmasa, dunyo bo‘ylab millionlab odam ocharchilik yoqasiga borib qolishi mumkinligi haqida ogohlantirdi. Guterrish bu fikrni tashkilotning Xavfsizlik kengashi yig‘ilishida bildirdi. Bu haqda “RBK” xabar berdi.
“Agar shoshilinch choralar ko‘rilmasa, millionlab odamlar ocharchilik va o‘lim yoqasida qoladi”, — deb ta’kidladi bosh kotib.
BMTning umumiy ma’lumotlariga ko‘ra, 2020-yilda jami 88 million odam ocharchilikdan aziyat chekdi, bu 2019-yilgi ko‘rsatkichdan 20 foizga ko‘proq.
“2021-yilgi prognozlar ushbu qo‘rqinchli tendensiya davom etishini ko‘rsatmoqda”, — dedi Guterrish va iqlim o‘zgarishlari va koronavirus pandemiyasi vaziyatni yanada kuchaytirayotganini qo‘shimcha qildi.
2020-yilning aprel oyida BMTning Butunjahon oziq-ovqat dasturi (BOD) ijrochi direktori Devid Bizli agar oziq-ovqat xavfsizligi ta’minlanmasa, koronavirus pandemiyasi sababli insoniyat “Injil miqyosidagi” ochlikka duch kelishi mumkinligini ta’kidlagan edi.
BOD 2020-yilning oxirigacha dunyo bo‘yicha 265 million kishi oziq-ovqat yetishmasligi muammosiga duch kelishi mumkinligini prognoz qilgan edi. Gap birinchi navbatda ocharchilikdan aziyat chekayotganlarning yarmi yashaydigan Afrika mamlakatlari haqida ketmoqda. Yaqin Sharq va Osiyoda ocharchilikka duch kelgan yana 43 million odam yashaydi. Karib dengizi va Lotin Amerikasida esa bu ko‘rsatkich 18,5 million kishini tashkil qiladi.
Avvalroq BMTning Atrof-muhitni muhofaza qilish dasturi (UNEP) taqdim etgan yangi hisobotda dunyodagi oziq-ovqat mahsulotlarining uchdan bir qismi chiqitga chiqib ketishi ma’lum qilingan edi.
Izoh (0)