Qirg‘iziston prezidenti Sadir Japarov Shavkat Mirziyoyev hamrohligida Toshkent shahridagi texnoparkka tashrif buyurdi, deb xabar bermoqda Prezident matbuot xizmati.
Ushbu majmua davlat rahbarining 2019-yil 1-maydagi “Sanoat kooperatsiyasini yanada rivojlantirish va talab yuqori bo‘lgan mahsulotlar ishlab chiqarishni kengaytirish chora-tadbirlari to‘g‘risida”gi qarori asosida tashkil etilgan. Bu yerda umumiy qiymati 365 million dollarlik 17 ta loyiha amalga oshirilmoqda.
Xabarda aytilishicha, Qirg‘iziston prezidentiga texnoparkdagi korxonalarda ishlab chiqarilayotgan mahsulotlar: maishiy texnikalar, elektron gaz hisoblagichlar, liftlar, suv nasoslari, sanoat konditsionerlari va sovitish tarmoqlari haqida ma’lumot berildi.
Davlat rahbarlari O‘zbekistonning sanoat, qishloq xo‘jaligi va hunarmandchilik mahsulotlari ko‘rgazmasi bilan tanishdi. Ko‘rgazmaga 24 ta tarmoq va 14 hududda ishlab chiqarilayotgan mingdan ortiq mahsulotlar qo‘yilgan.
Prezident Shavkat Mirziyoyev Qirg‘izistonda ham kerakli salohiyat borligi, uni yuzaga chiqarish uchun O‘zbekiston kooperatsiyalar tashkil etish va tajriba almashishga tayyor ekanini ta’kidladi. Tarmoq rahbarlariga Qirg‘izistondagi turdosh muassasalar bilan yaqindan ishlab, qo‘shma loyihalarni amalga oshirish bo‘yicha ko‘rsatmalar berdi.
Eslatib o‘tamiz, Qirg‘iziston prezidenti Sadir Japarov Prezident Shavkat Mirziyoyevning taklifiga binoan davlat tashrifi bilan O‘zbekistonga 11-mart kuni keldi. Uni bosh vazir Abdulla Aripov kutib oldi. Shu kuni Japarov bosh vazir Abdulla Aripov hamrohligida Toshkentdagi Mustaqillik maydoniga tashrif buyurdi va Mustaqillik va ezgulik monumenti poyiga gulchambar qo‘ydi. Shundan so‘ng Ko‘ksaroy qarorgohiga yo‘l oldi.
Ko‘ksaroyda Qirg‘iziston prezidenti Sadir Japarovni rasmiy kutib olish marosimi bo‘ldi. Dastlab davlat rahbarlarining tor doiradagi muzokaralari o‘tdi. Uchrashuv chog‘ida O‘zbekiston bilan Qirg‘iziston o‘rtasidagi strategik sheriklik munosabatlarini mustahkamlash, ko‘p qirrali hamkorlikni kengaytirish masalalari muhokama qilindi. So‘ng Shavkat Mirziyoyev va Sadir Japarov muzokaralarni ikki mamlakat rasmiy delegatsiyalari ishtirokida davom ettirdi.
Muzokaralar yakunlangach, O‘zbekiston va Qirg‘iziston o‘rtasida jami 22 ta hujjat imzolandi. Prezident Shavkat Mirziyoyev ommaviy axborot vositalari vakillari bilan uchrashuvda muzokaralar ishonch muhitida o‘tgani, tomonlar o‘zaro hurmat va manfaatlarni hisobga olish tamoyillari asosida keng miqyosli vazifalarni hal qilishga tayyor ekanini qayd etdi.
Tadbirlar yakuniga yetgach, O‘zbekiston Prezidenti Shavkat Mirziyoyev nomidan Qirg‘iziston prezidenti Sadir Japarov tashrifi sharafiga rasmiy qabul marosimi tashkil etildi. Marosimda ikki mamlakat rasmiy delegatsiyasi a’zolari, davlat va jamoat arboblari, O‘zbekistondagi qirg‘iz diasporasi vakillari ishtirok etdi.
Izoh (0)