Ayshvariya Ray o‘rniga Karina Kapur, Shohrux Xon o‘rniga Salmon Xon: “Devdas” filmi haqida ko‘pchilikka noma’lum bo‘lgan qiziqarli ma’lumotlar (foto)

Hind kinematografiyasida alohida o‘ringa ega bo‘lgan “Devdas” filmi hanuzgacha sevib tomosha qilinadi. Ammo kadr orti jarayonlariga tegishli bo‘lgan qiziqarli ma’lumotlar bilan esa ko‘pchilik tanish emas.

Kartinada Shohrux Xonning do‘sti Chunnilala obraziga Saif Ali Xon, Manoju Bajpai va Govindalar taklif etilgan. Ammo ularning barchasi bu rolni rad etgan. Natijada ushbu qahramonni Jeki Shroff ijro etgan. Eng qizig‘i, Devdas roli dastlab Salmon Xonga taklif qilingan bo‘lib, aktyorning rad javobi tufayli Shohrux Xonga nasib etgan.

Madhuri Dikshit esa suratga tushish jarayonida birinchi farzandiga homilador edi.

Karina Kapur Sanjayning dastlabki ikki taklifini rad etgan bo‘lsa-da, o‘zini Paru sifatida sinab ko‘rgan.

Filmdan o‘rin olgan “Kahed Chedd Mohe” taronasida Madhurining libosi 30 kilogramm og‘irlikda bo‘lgan. Shu tufayli ham raqs jarayonida ko‘plab muammolar paydo bo‘lgan. Ammo katxak ustasi Berxu Maxaraj aktrisaga yengillik yaratish uchun oson harakatlarni o‘ylab topgan.

Bhansalining so‘zlariga ko‘ra, Paruning bejirim uyining rangi oynalari  noyabrdan iyun oyigacha, musson shamoli bo‘lmagan vaqtda qurilgan. Ammo qurilish jarayonida 4 marotaba yog‘gan yomg‘ir tufayli oyna rangi xiralashib qolgan. Shuning uchun ularni doimo bo‘yashga to‘g‘ri kelgan.

Bastakor Ismoil Darbar ikki yarim yil davomida film uchun musiqa yaratgan. Ammo ularni yozib olish uchun atigi o‘n kun vaqt ketgan.

Ayshvariya Ray o‘zi suratga tushgan filmlar ichida eng sevimlisini “Devdas” deb biladi. Aynan ushbu loyiha uni 2002-yilda “Kann” festivalidagi qizil gilamchaga olib chiqqan edi. 2017-yil L’Oreal Paris ochiq osmon ostidagi kinoteatrda namoyish etilgan filmda aktrisa o‘z rolini qoyilmaqom tarzda ijro etgan.

Bundan tashqari “Devdas” filmi “Time” jurnali talqiniga ko‘ra, ming yillik dunyo filmlarining kuchli o‘ntaligidan o‘rin olgan.