O‘zbekistonlik yosh arxitektorlar jamoasi “SUM” qarshisidagi bog‘ yonida qad rostlaydigan Mustaqillik monumenti bo‘yicha o‘z variantlarini taqdim etdi. Bu bog‘ va 30 ta stilizatsiyalangan ustundan iborat “ekologik” arxitektura yechimi hisoblanadi, deb xabar beradi “Podrobno”.

Foto: “Podrobno”

Loyiha dizayni ustida arxitektorlar Taxmina Tudialiyeva, Husniddin Tursunqulov va Islombek O‘razboyev ishlagan bo‘lib, ular xalqaro arxitektura tanlovlarida muvaffaqiyatli ishtirok etib keladi.

“Arxitektor sifatida biz aholi va hukumat talablarini hisobga olgan holda ‘Istiqlol’ monumentini yaratish bo‘yicha ‘ekologik’ arxitektura yechimini taklif etishni o‘z burchimiz deb hisoblaymiz. Bog‘ hududida monument uchun ajratilgan maydoncha obodonlashtirish va makonning estetik yechimiga muhtoj. Hukumatning ushbu maydonchaga Mustaqillik mavzusini berish niyatini inobatga olgan holda, biz an’anaviy mavzularga mos 30 ta stilizatsiyalangan ustunlarni o‘rnatishni taklif qilamiz, ularning har biriga mustaqil O‘zbekistonning har bir yilida erishilgan asosiy yutuqlar bitiladi”, — deydi arxitektorlar.

Foto: “Podrobno”

Ustunlar o‘rtasida bog‘ joylashib, u o‘zida mahalliy madaniyatni ifoda etadi.

Har bir ustunning asosi toshdan yasaladi, ustunning shiftga tutashadigan yuqori qismi esa zamonaviy talqin bilan bezatilgan o‘zbek naqshlaridan iborat yengil konstruksiyadan tashkil topadi.

Foto: “Podrobno”

“Bog‘ hududida uzoq yillardan beri mavjud bo‘lgan kitob rastalarini qo‘llab-quvvatlash maqsadida kitob o‘qish uchun kichik arxitektura shakllari va mavzuga oid installyatsiyalar o‘rnatiladi. Shuningdek, boshqa funksional zonalarni takomillashtirish ham ko‘zda tutilgan. Mazkur kompozitsiya ‘Moviy gumbazlar’ bulvarini uyg‘un ravishda to‘ldirib, milliy arxitektura ruhini qo‘llab-quvvatlaydi”, — deydi arxitektorlar.

Foto: “Podrobno”

Ma’lumot uchun, 10-mart kuni Toshkent shahar hokimligi “SUM” qarshisidagi bog‘da mustaqillik stelasini yaratish bo‘yicha tanlov natijalarini e’lon qilish kerak.

Eslatib o‘tamiz, O‘zbekiston mustaqilligining 30 yilligiga bag‘ishlab “Istiqlol” majmuasini qurish va unda “mustaqillikning mohiyati va ulkan tarixiy ahamiyatini aks ettiruvchi monumental kompozitsiya”ni yaratish Prezidentning 2020-yil 17-dekabrdagi farmonida ko‘zda tutilgan edi. Majmuani barpo etish joyi sifatida Sharof Rashidov, Islom Karimov va Afrosiyob ko‘chalari oralig‘ida, Markaziy univermag (SUM) qarshisidagi hudud tanlangan.

Avvalroq Jahongir Ortiqxo‘jayev “Istiqlol” majmuasini barpo etish masalasi yuzasidan aholi bilan uchrashgani va bog‘dagi bir dona daraxt kesilsa, o‘sha kuniyoq lavozimidan ketishga tayyorligini ma’lum qilgan edi. Shuningdek, poytaxt rahbari Toshkent shahar hokimligiga ishonchsizlik bildirayotganlarga javob qaytargandi.