Islomobodda amaliy tashrif bilan bo‘lib turgan O‘zbekiston tashqi ishlar vaziri Abdulaziz Komilov 2021-yilning 10-mart kuni Pokiston bosh vaziri Imron Xon tomonidan qabul qilindi. Bu haqda vazirlik matbuot xizmati xabar qildi.
Vazir O‘zbekiston Prezidenti Shavkat Mirziyoyevning Pokiston bosh vaziri Imron Xonga yo‘llagan maktubini yetkazdi.
Muzokaralar chog‘ida ikki tomonlama kun tartibining muhim jihatlari, xususan, siyosiy, savdo-iqtisodiy, investitsiyaviy, transport-kommunikatsiya, madaniy-gumanitar va boshqa sohalarda O‘zbekiston–Pokiston munosabatlarini yanada rivojlantirishning istiqbolli yo‘nalishlari muhokama qilindi.
Mintaqaviy masalalarga, birinchi navbatda, Afg‘oniston zaminida tinchlik va barqarorlikni ta’minlashga alohida e’tibor qaratildi.
Shu nuqtayi nazardan, Afg‘oniston iqtisodiyotini tiklashga yordam beradigan infratuzilma loyihalarini, jumladan, ular orasida eng muhimi Mozori-Sharif—Kobul—Peshavor temiryo‘lini amalga oshirish yuzasidan o‘zaro hamkorlik to‘g‘risida fikr almashildi. Bu Pokistonning Karachi va Gvadar dengiz portlariga kirish imkonini beradi. O‘z navbatida esa O‘zbekiston bilan Pokiston hamda Markaziy va Janubiy Osiyo o‘rtasidagi o‘zaro savdo hajmini oshirishga imkon beradi.
Muloqot davomida tomonlarni qiziqtirgan boshqa masalalar ham ko‘rib chiqildi.
Shuningdek, Abdulaziz Komilov Pokiston tashqi ishlar vaziri Shoh Mahmud Qurayshiy bilan uchrashdi.
Muzokaralar chog‘ida ko‘p qirrali O‘zbekiston–Pokiston munosabatlarining hozirgi holati va rivojlanish istiqbollari muhokama qilindi.
O‘zaro savdo hajmini yanada oshirish, uning turini kengaytirish, qo‘shma investitsiya va infratuzilma loyihalarini faol amalga oshirish yuzasidan kelishuvlarga erishildi. Shu maqsadda ikki mamlakat hukumatlari imtiyozli savdo, bank va bojxona hamkorligini yo‘lga qo‘yish, shuningdek, muntazam parvozlarni tiklash bo‘yicha faol ish olib bormoqda.
Tashqi ishlar vazirlari afg‘onlararo muzokaralarni yo‘lga qo‘yish, Afg‘onistonda barqaror tinchlik o‘rnatishga ko‘maklashish uchun xalqaro hamjamiyatning sa’y-harakatlarini birlashtirish muhimligini qayd etdilar.
Madaniy-gumanitar munosabatlar, shuningdek, turizm sohasidagi o‘zaro aloqalarga alohida e’tibor qaratildi. Tarixiy, madaniy va ma’naviy jihatdan mintaqalar va mamlakatlar sivilizatsiyasi o‘zaro manfaatli hamkorlikning ishonchli asosi bo‘lib xizmat qilishi ta’kidlandi.
Vazirlar BMT, IHT, ShHT, Iqtisodiy hamkorlik tashkiloti va boshqa xalqaro hamda mintaqaviy tuzilmalar doirasidagi ko‘p tomonlama hamkorlik masalalarini muhokama qildi.
Shuningdek, O‘zbekiston va Pokiston o‘rtasidagi harbiy-texnik hamkorlikni yanada rivojlantirish istiqbollari muhokama qilindi.
Pokiston tashqi ishlar vaziri 2021-yil Toshkent shahrida bo‘lib o‘tadigan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiyaga taklif qilindi.
Turli darajadagi tadbirlar jadvali va ularning tashkiliy jihatlari ko‘rib chiqildi
Uchrashuvda tomonlar o‘zlarini qiziqtirgan mintaqaviy va global kun tartibining boshqa masalalari bo‘yicha ham fikr almashdi.
Bundan avval Abdulaziz Komilov Yevropa Ittifoqining O‘zbekistondagi delegatsiyasi rahbarini qabul qilgani, O‘zbekiston va Rossiya TIV rahbarlari Shavkat Mirziyoyevning Moskvaga kutilayotgan tashrifiga tayyorgarlikni muhokama qilgani hamda Shavkat Mirziyoyev Iqtisodiy hamkorlik tashkilotining 14-sammitida ishtirok etib, nutq so‘zlagani haqida xabar berilgandi.
Izoh (0)