Caviar zargarlik kompaniyasi iPhone 12 Pro, 12 Pro Max va iPad Pro o‘rin olgan yangi lyuks jamlanmani namoyish etdi, deb xabar beradi “Afisha.uz”.
Foto: Caviar
Birinchi va eng qimmat model — iPad Pro Grand Apple plansheti bo‘lib, yagona nusxada yaratilgan. Uning orqa tomoni noyob olma daraxti yog‘ochidan ishlangan, undagi olma daraxti tasviri 750 probali oltin bilan qoplangan, olmalar esa 81 ta brilliant bilan bezatilgan. Mazkur iPad’ni yaratishga bir kilogrammdan ortiq oltin sarflangan.
Olma daraxti ostidagi “yerga” Apple rahbarlaridan iqtibos tushirilgan: Stiv Jobsning “Yuragingiz va intuitsiyangizga ergashish uchun jur’at toping” va Tim Kukning “Quvonchingiz uzoq maqsadda emas, sayohatingizda bo‘lsin”.
128 gigabayt ichki xotira o‘rnatilgan “bazaviy” iPad Pro 11 Grand Apple’ni 183 310 dollarga xarid qilish mumkin, 1 terabaytli iPad Pro 12,9 Grand Apple narxi esa 185 690 dollarni tashkil etadi.
Foto: Caviar
Caviar “qisqartirilgan” versiyani ham taqdim etgan — u iPad Pro Diamond Apple bo‘lib, 99 nusxada sotuvga chiqadi. Unda sof oltin o‘rniga Double Electroplated texnologiyasi orqali tushirilgan 999 probali ikkitalik zarhal ishlatilgan. Olmalarga esa 81 ta brilliant qotirilgan. Orqa tomonida faqat bitta — Tim Kukning iqtibosi mavjud.
128 gigabayt ichki xotiraga ega iPad Pro 11 Diamond Apple modeli 11 490 dollardan, 1 terabaytli iPad Pro 12,9 Diamond Apple esa 12 880 dollardan sotuvga chiqadi.
Foto: Caviar
Shuningdek, Diamond Apple lineykasidan iPhone 12 Pro va 12 Pro Max modellari ham o‘rin olgan. Telefonlar noyob olma daraxtining yog‘ochi bilan bezatilgan, to‘qqizta brilliant qotirilgan va Tim Kukdan iqtibos mavjud.
iPhone 12 Pro Diamond Apple’ning boshlang‘ish narxi 8910 dollarni tashkil etadi. Ichki xotirasi 512 gigabaytga teng iPhone 12 Pro Max Diamond Apple narxi esa 15 750 dollardan boshlanadi.
Foto: Caviar
Zargarlik kompaniyasi mazkur yangi modellarning eng arzon versiyasi — Golden Apple lineykasini ham taqdim etgan bo‘lib, undan planshetlar va smartfonlar o‘rin olgan. Qurilmalarning orqa tomonida brilliant yo‘q, daraxt ostidagi “yer” qismi esa yog‘ochdan ishlangan.
128 gigabaytli iPad Pro 11 Apple narxi 8140 dollardan, 1 terabaytli iPad Pro 12,9 Golden Apple esa 9520 dollardan boshlanadi. Ichki xotirasi 128 gigabaytga teng iPhone 12 Pro Golden Apple narxi 6080 dollarni tashkil etsa, 512 gigabaytli iPhone 12 Pro Max Golden Apple’ni 12 920 dollarga xarid qilish mumkin.
Caviar kompaniyasi bunga qadar smartfon-tank — iPhone T-34’ni, Rossiya prezidenti Vladimir Putinning portreti va imzosi aks ettirilgan iPhone 6s’ni, AQSh prezidenti Donald Tramp sharafiga tilla iPhone 7 kabi noyob modellarni taqdim etgan.
