O‘zbekiston ichki ishlar vaziri Po‘lat Bobojonovning shaxsiy tarkib bo‘yicha buyrug‘i bilan lavozim tayinlovlari amalga oshirildi. Bu haqda 4-mart kuni IIV matbuot xizmati xabar berdi.
Shu vaqtgacha Sirdaryo viloyati Shirin shahar IIB boshlig‘i lavozimida faoliyat yuritgan mayor Zahiriddin Sadriddinovich Sobirov viloyatning boshqa — Yangiyer shahri IIBga boshliq etib tayinlandi. Shu kungacha Sirdaryo viloyati IIB bo‘lim boshlig‘i lavozimida faoliyat yuritgan podpolkovnik Akmal Ne’matovich Xolmatov esa Sobirovning o‘rniga Shirin shahar IIB boshlig‘i etib tayinlangan.
Podpolkovnik Iqboljon Abdubannobovich Hamroqulov Farg‘ona viloyati Quvasoy shahar IIB boshlig‘i lavozimiga tayinlangan — u joriy tayinlovga qadar Farg‘ona viloyati IIB bo‘lim boshlig‘i edi.
Podpolkovnik G‘ulom Masharifovich Sharipov Xorazm viloyati Urganch tumani IIB boshlig‘i etib tayinlangani munosabati bilan Xiva shahar IIB boshlig‘i lavozimidan ozod etilgan. Uning o‘rniga shu vaqtgacha Xorazm viloyati IIB Kadrlar boshqarmasi boshlig‘i o‘rinbosari — kasbiy tayyorgarlikni tashkillashtirish bo‘limi boshlig‘i lavozimida faoliyat yuritgan podpolkovnik Botir Narimboyevich Otajonov Xiva shahar IIB boshlig‘i etib tayinlangan.
Avvalroq Buxoro viloyati Kogon shahar IIB boshlig‘i lavozimiga podpolkovnik Azizbek Jo‘rayevich Rajabov tayinlangani haqida xabar berilgan edi. U mazkur tayinlovga qadar Buxoro viloyat IIB Xavfsiz turizmni ta’minlash boshqarmasi boshlig‘ining o‘rinbosari — muvofiqlashtirish bo‘limi boshlig‘i lavozimida faoliyat yuritgan.
Izoh (0)