Nikaraguada aholini “Sputnik V” vaksinasi bilan emlash boshlandi

Nikaragua poytaxti Managuada aholini Rossiyaning “Sputnik V” vaksinasi bilan emlash boshlandi. Vaksinani birinchi bo‘lib surunkali buyrak yetishmovchiligi va gipertoniya kasalligi bo‘lgan 62 yoshli bemor oldi. Bu haqda “Kommersant” xabar berdi.

Mamlakatda birinchi navbatda buyrak yetishmovchiligi, yurak muammolari va saraton kabi surunkali kasalliklardan aziyat chekadigan bemorlar vaksinatsiya qilinadi.

Nikaraguada “Sputnik V” 3-fevral kuni ro‘yxatdan o‘tkazilgan edi. Vaksinaning birinchi partiyasi esa 25-fevral kuni bepul yetkazib berildi. Rossiyaning “Sputnik V” vaksinasi dunyoning 30 dan ortiq davlatida ma’qullangan.

Avvalroq “Sputnik V” ishlab chiqaruvchilari “Sputnik Layt”ni ro‘yxatdan o‘tkazish uchun ariza bergan edi. Undan foydalanishni mart oyida boshlash rejalashtirilgan. Uning samaradorligi past, chunki unga vaksinaning faqat bitta komponenti qo‘shilgan.

Avvalroq Rossiyada “Sputnik V” vaksinasining narxi ikki baravar pasaytirilgani haqida xabar berilgan edi.