Toshkent davlat yuridik universiteti 3-bosqich talabasi Bahodir Bozorov baxtsiz hodisa oqibatida vafot etdi. Bu haqda universitetning Telegram kanalida xabar qilindi.

Foto: TDYU

Bosh prokuraturaning “Daryo”ga ma’lum qilishicha, hodisa 27-fevral kuni taxminan soat 22:30 larda yuz bergan. Surxondaryolik 27 yoshli yigit 2021-yilning 9-yanvaridan buyon Xuber Global Konctruction MChJda sinov muddati asosida ishga qabul qilinib, Toshkent shahri Bektemir tumani Husayn Boyqaro ko‘chasi 9-uydagi qurilishi tugallanmagan binoda ishlab, yashab kelgan. Bahodir Bozorov mazkur binoning ikkinchi qavatidan lift uchun mo‘ljallangan shaxtaning ichiga qulab tushgan.

Respublika shoshilinch tibbiy yordam ilmiy markazi Toshkent viloyati filialining 27-fevraldagi 1-son dalolatnomasida Bozorov shifoxonaga olib keltirilgan vaqtda vafot etgan bo‘lganligi ko‘rsatilgan.

Hozirda holat bo‘yicha sud tibbiy ekspertizasi tayinlanib, mehnatni muhofaza qilish va mehnat sharoitlari ekspertizasi Davlat inspeksiyasiga holat yuzasidan xulosa taqdim etish uchun tergovga qadar tekshiruv davomida to‘plangan hujjatlar taqdim etilgan.

Bosh prokuraturaning ma’lum qilishicha, tergovga qadar tekshiruv ishlari davom etmoqda.

Eslatib o‘tamiz, 27-fevral kuni Yunusobodda ijarada yashovchi besh nafar talabaning murdasi topildi. Ularning uch nafari Toshkent Axborot texnologiyalari universiteti, bir nafari Singapur menejmentni rivojlantirish instituti, yana bir nafari Inha universiteti talabasi bo‘lgan. Jabrlanuvchilarning o‘limi noma’lum moddadan o‘tkir zaharlanish natijasida yuz bergan. Ushbu fojiadan so‘ng ijarada yashovchi talabalarni monitoring qilish bo‘yicha topshiriq berildi.