Oliy Majlis Qonunchilik palatasida 2-mart kuni o‘tkazilgan “Hukumat soati”da Oliy va o‘rta maxsus ta’lim vaziri Abduqodir Toshqulov talabalarning yotoqxonalarga bo‘lgan ehtiyoji haqida so‘z yuritdi, deya xabar bermoqda “Daryo” muxbiri.
“O‘tgan to‘rt yil davomida OTMlarga qabul kvotasi, talabalar soni 2 baravardan 3 baravargacha oshgan bir sharoitda, yotoqxonalarning o‘rin soni esa atigi 25 foizga oshdi. Shuning uchun ham juda ko‘p talabalar ijarada, qarindoshinikida yashashga va ko‘plab muammolarga duch keldi.
Hozirda respublikada mavjud 228 ta talabalar turar joyida 58 ming nafar talaba istiqomat qilyapti. 2017-yilda esa 194 ta talabalar turar joyida 50,5 ming nafar talaba yashagan. Raqamlardan ko‘rinib turibdiki, mamlakat oliy ta’lim muassasalari tasarrufida bo‘lgan yotoqxonalar bugungi kunda mavjud ehtiyojlarning ma’lum bir qisminigina qamrab olgan”, — dedi Toshqulov.
Uning ma’lum qilishicha, 2017-yildan boshlab hukumat qarorlari bilan faoliyati tugatilgan kasb-hunar kollejlarining 35 tasini 6 ming 130 o‘ringa ega bo‘lgan yotoqxonalari qo‘shimcha quvvat sifatida OTMlarga o‘tkazib berilgan.
“Hisob-kitoblarga ko‘ra, bugungi kunda yotoqxonalarda yashashga ehtiyoji bo‘lgan talabalar soni 149 ming 400 nafarni tashkil etmoqda. Abituriyentlarga 5 ta ta’lim yo‘nalishini tanlashdek imkoniyatning berilishi talabalar turar joyiga bo‘lgan ehtiyojni oshirib yubordi. Hattoki sirtqida o‘qiydigan talabalarga ham. Boshqa viloyatdagi OTMning sirtqi bo‘limiga o‘qishga kirgan talaba ham 1 oy bo‘lsa-da, talabalar turar joyiga muhtoj bo‘lyapti. Chunki uning o‘sha joyda qarindoshi yo‘q, mehmonxonalar qimmat... Buni amaliyotda o‘zimiz ko‘rdik”, — dedi Toshqulov.
Mavzuga doir:
- “To‘rt yilda oliy ta’lim tizimi ham ‘reanimatsiya’ bo‘ldi” – oliy va o‘rta maxsus ta’lim vaziri
- Abduqodir Toshqulov Yunusobodda murdasi topilgan besh talabaning yaqinlariga moddiy yordam ko‘rsatilganini ma’lum qildi
- “OTM yotoqxonasida bir talaba bilan tonggacha suhbat qurib, undan butun sir-asrorni so‘rab oldim” - Abduqodir Toshqulov
Izoh (0)