Pandemiya 2022-yildan oldin tugamaydi, deb hisoblaydi Microsoft asoschisi Bill Geyts. Bu haqda uning CNN bilan bo‘lgan intervyusiga tayanib, “Korrespondent.net” xabar berdi.
Uning so‘zlariga ko‘ra, hozirda pandemiyaga qarshi ko‘rilayotgan choralar yetarli emas. Shuningdek, u dunyoda koronavirusga qarshi vaksinaning shuncha tez yaratilgani va ommaviy vaksinatsiya boshlanganini mo‘jiza deb atadi.
“Menimcha, AQSh kuzda deyarli koronavirusgacha bo‘lgan holatiga qaytishi mumkin, lekin virusni yengish uchun COVID-19’ga qarshi global kurashga ko‘proq hissa qo‘shish va vaksinani kengroq tarqatish kerak”, — dedi Geyts.
Uning ta'kidlashicha, hozirda vaksinalar, asosan, boy davlatlar tomonidan qabul qilinyapti va uning fondi bu muammodan xavotirda.
Tadbirkorning so‘zlariga ko‘ra, virusning yangi shtammlari paydo bo‘lishi va unga qayta chalinish oqibatida bu kasallikka qarshi kurash insoniyatdan butun 2022-yilni talab qilishi mumkin. Virusni eng qisqa vaqt ichida yengish uchun samaraliroq choralar ko‘rilishi kerak.
Avvalroq Bill Geyts yangi turdagi koronavirus infeksiyasidan to‘liq himoyalanish uchun virus mutatsiyasini hisobga olgan holda o‘zgartirilgan preparatni o‘z ichiga oluvchi vaksinaning uchinchi dozasi talab etilishi mumkinligini aytdi.
Shuningdek, Bill Geyts pandemiyadan keyin insoniyat duch keladigan ikkita xavf haqida ogohlantirdi.
Izoh (0)