Rolls-Royce “kosmik” Phantom’ni taqdim etdi (foto)

Rolls-Royce markasining flagman Phantom modeli Tempus Collection nomli yangi maxsus versiyaga ega bo‘ldi. Gudvudlik dizaynerlar boy illyuminatsiyaga ega interyerni yaratishda astronomik hodisalar va koinotning cheksizligiga murojaat qilgan, deb yozadi Motor.

“Kosmik” Phantom’ning markaziy elementini birinchi bor 1967-yilda Yerdan 280 yorug‘lik yili uzoqligida aniqlangan turli kosmik nurlanishlar manbai bo‘lgan pulsar tashkil etadi. Sedan salonida ushbu neytron yulduz firmaning “yulduzli shifti”da tasvirlangan.

Shu bilan birga, sedanning old panelini jihozlanishi vaqt mavzusiga bag‘ishlangan. Phantom Tempus analog soatlardan mahrum bo‘lgan: bu mashina egasi har qanday vaqt cheklovlaridan mustaqil ekanligining ramzi hisoblanadi. Alyuminiy “zagotovka”dan 100 ta “ustun” qirqilgan bo‘lib, ulardagi egilishlar xuddi uch o‘lchamli tasvirni hosil qilgandek. Mazkur son ham bekorga tanlanmagan: pulsarning aylanish davri 100 million yilga teng.

Phantom Tempus Collection’ning eshiklari yuzlab “yulduz”lardan iborat nur sochuvchi naqshlar va kontrast charm bilan bezatilgan. Qo‘lqop qutisiga esa Albert Eynshteyndan iqtibos tushirilgan: “O‘tmish, hozirgi zamon va kelajak o‘rtasidagi farq — ancha xira illyuziyadan boshqa narsa emas”.

Sedan eksteryeri uchun Bespoke bo‘linmasi alohida to‘q ko‘k — Kairos Blue bo‘yog‘ini yaratgan bo‘lib, u shaffof mineral zarralarining qo‘shilishi hisobiga yaltiraydi.

Eksklyuziv versiyaga bonus sifatida noyob aksessuar taqdim etiladi — qo‘lda pulsar tasviri tushirilgan shampan qutisi. Uning ichida butilkani muzlatishga mo‘ljallangan idish, tog‘ billuridan tayyorlangan to‘rtta bokal o‘rin olgan bo‘lib, ular V12 motorining silindrlarini yodga soladigan holda terilgan.

Phantom’ning boshqa o‘ziga xos versiyalari kabi Tempus Collection ham cheklangan tirajda — 20 nusxada taqdim etiladi va hozirda ularning barchasi o‘z egalarini topib ulgurgan. Eksklyuziv model narxi oshkor etilmagan.