Ukrainada COVID-19 sababli karantin muddati uzaytirildi

Ukraina hukumati koronavirus sababli joriy qilingan karantin muddatini 30-aprelgacha uzaytirdi. Bu haqda “RBK” xabar berdi.

24-fevraldan mamlakat karantinning moslashuvchan shakliga o‘tdi. Hududlarga epidemiologik xavfning to‘rt darajasidan biri beriladi — “yashil”, “sariq”, “to‘q sariq” yoki “qizil”.

“Sariq” daraja butun mamlakat uchun asos sifatida o‘rnatildi, unda bir qator qoidalar yumshatiladi: har 4 kvadrat metrda bir kishidan ortiq odam bo‘lmaslik sharti bilan ommaviy tadbirlar o‘tkazishga, kinoteatrlar va madaniyat muassasalari uchun zallarning yarmigacha to‘ldirishga ruxsat beriladi. Restoranlarning faoliyati soat 00:00 dan 07:00 gacha cheklanadi, bu vaqtda ular yetkazib berish xizmatini amalga oshirishi mumkin. Transport va boshqa jamoat joylarida majburiy niqob taqish tartibiga amal qilinadi.

Epidemiologik vaziyat yomonlashsa, xavf darajasi “to‘q sariq” rangga almashadi. O‘zini o‘zi boshqarish organlari qo‘shimcha cheklovlar kiritishi mumkin bo‘ladi.

Agar epidemiologik ko‘rsatkichlar ketma-ket uch kun belgilangan darajadan oshib ketsa, hudud “qizil” darajaga o‘tadi va qat’iy karantin joriy etiladi. “Qizil” darajada umumiy ovqatlanish shoxobchalari, savdo markazlari, ko‘ngilochar maskanlar, shuningdek, barcha do‘konlarning faoliyatiga taqiq qo‘yish ko‘zda tutilgan. Oziq-ovqat va birlamchi ehtiyojdagi mahsulot do‘konlari bundan mustasno.

Ukrainada 8-yanvardan qat’iy karantin joriy qilingan edi. Cheklovlarni yumshatish birinchi marta 24-yanvardan amal qila boshladi. Yumshatilgan cheklovlar 28-fevraldan keyin bekor qilinishi kerak edi, lekin hukumat karantinni yana 30-aprelgacha cho‘zishga qaror qildi.

Mamlakat Sog‘liqni saqlash vazirligi ma’lumotlariga ko‘ra, pandemiya boshidan buyon Ukrainada 1,3 million ta virusga chalinish holati qayd etildi, bemorlarning 25,3 ming nafari virus qurboniga aylandi.

Ukrainada aholini vaksinatsiya qilish hali boshlanmadi. Mamlakat rasmiylari “tajovuzkor davlat” deb tan olingan Rossiyaning COVID-19’ga qarshi vaksinasini ro‘yxatdan o‘tkazishni taqiqladi. Qashshoq mamlakatlarni vaksina bilan ta’minlashni ko‘zda tutuvchi COVAX dasturi doirasida Ukraina Pfizer kompaniyasidan 117 ming, AstraZeneca va Novavax kompaniyalaridan 12 million doza vaksina olishni kutmoqda. Shuningdek, hukumat oldindan Xitoyning Sinovac kompaniyasi tomonidan ishlab chiqarilgan vaksinaga 1,9 million doza buyurtma berdi.