Yaponiya bosh vaziri o‘g‘lining amaldorlar bilan ovqatlangani uchun uzr so‘radi

Yaponiya bosh vaziri Yosixide Suga mamlakat Ichki ishlar va kommunikatsiyalar vazirligi vakillari bilan bo‘lgan kechki ovqatda o‘g‘lining qatnashgani uchun kechirim so‘radi. Bu haqda Tokyo Shimbun axborot nashriga tayanib Tengrinews xabar berdi.

Nashr ma’lumotlariga ko‘ra, 2020-yilda Yaponiya Ichki ishlar va kommunikatsiyalar vazirligining to‘rt rahbari bosh vazir Yosixide Suganing Tohokushinsha Film telekompaniyasida ishlaydigan to‘ng‘ich o‘g‘li bilan ovqatlangan edi. Taxminlarga ko‘ra, Seygo Suga amaldorlarning ovqatlanishi uchun hisobni o‘zi to‘lagan va telekompaniya bilan bog‘liq masalalarni muhokama qilgan.

Avvalroq Tokioda Vazirlar Mahkamasining yig‘ilishi o‘tkazilib, unda mansabdor shaxslarning odob-axloq qoidalarini buzish masalalari muhokama qilingan edi.

“Mansabdor shaxslarning odob-axloq qoidalarining buzilishiga olib kelgan harakatlarida o‘g‘limning ishtiroki uchun uzr so‘rayman”, — dedi bosh vazir.

Seygo Suga Tohokushinsha Film telekompaniyasida ishlaydi. Uning faoliyat ko‘rsatishi sun’iy yo‘ldosh eshittirish litsenziyasining mavjudligiga bog‘liq. Bu litsenziya Ichki ishlar va kommunikatsiyalar vazirligi tomonidan beriladi.

Portalning xabar berishicha, Seygo Suga 2016-yildan beri kamida 12 marotaba mansabdorlar bilan ovqatlanib, ularga sovg‘alar ulashgan. Amaldagi qonunga ko‘ra, davlat xizmatchilari manfaatli shaxslardan har qanday sovg‘a olishi taqiqlanadi.

Avvalroq Yaponiya bosh vaziri karantin vaqtida tungi klublarga kirgan amaldorlar uchun uzr so‘ragani haqida xabar berilgan edi.