Suratga olish maydonchasida tanishib, so‘ng turmush qurgan Bollivud yulduzlari (foto)

Yulduzli juftliklarning aksariyati suratga olish maydonchasida tanishadi. Ularning ba’zilari munosabatlarni yarim yo‘lda yakunlasa, boshqalari muhabbatni nikoh bilan yanada mustahkamlaydi.

Ranvir Singx va Dipika Padukone

Ranvir uchun bu bir ko‘rishda muhabbat edi. U birinchi marta Dipikani Makaodagi “Zee Cine Awards” marosimida ko‘rgan. “Ram va Lila” kartinasining suratga olinish jarayonida esa tuyg‘ular yanada ayonlashgan. Juftlik bir necha yil davomida munosabatlarini yashirishga harakat qilgan va 2018-yilning kuz oyida Italiyada turmush qurgan.

Sayf Ali Xon va Karina Kapur

9 yildan buyon oila bo‘lib yashab kelayotgan juftlik bir-birini “Umidsiz” filmining suratga olish maydonchasida yoqtirib qolgan. O‘sha vaqtda Sayf Ali Xon turmush o‘rtog‘i Amrita bilan ajrashgan edi. Karina esa Shaxid Kapur bilan munosabatlariga yakun yasagan. Sayf Ali Xon Karinaga ikki marta turmushga chiqish taklifini bildirgan, ammo aktrisa rad etgan. Uchinchi marotabasida u rozi bo‘lgan va to‘y 2012-yilning 16-oktabrida bo‘lib o‘tgan.

Abhishek Bachchan va Ayshvariya Ray

14 yillik oilaviy baxtga ega Abhishek va Ayshvariya Bollivudning eng sevimli juftliklaridan biri. Ular 2001-yilda turmush qurgan va hozirda Aradhya ismli qizi bor. Juftlik “Sevgi haqida bir necha so‘z” filmining suratga olish maydonchasida uchrashgan, lekin dastlab ular orasida faqat do‘stlik bo‘lgan. Bir vaqtning o‘zida ular “Qalbdagi muz” filmida suratga tushgan va shundan so‘ng ularning orasidagi do‘stlik muhabbatga aylangan.

Ajay Devgan va Kajol

Ajay va Kajol birinchi marta 1995-yil “Oila va qonun” filmining suratga olish jarayonida uchrashgan. Dastlab ular bir-birida yaxshi taassurot qoldirmagan. Shuningdek, ikkisi ham boshqa insonlar bilan munosabatda bo‘lgan. Ammo “Gundaraj” filmining suratga olinishi vaqtida ular bir-birini yaxshi ko‘rishini anglab yetgan va uchrashishni boshlagan. Juftlik 1999-yilda turmush qurgan va 22 yildan buyon baxtli hayot kechirib kelmoqda.

Akshay Kumar va Tvinkl Xanna

Akshay va Tvinkl ilk marotaba “Filmfare” fotosessiyasida uchrashgan. 1999-yilda “Ajoyib o‘yin” filmi suratga olish maydonchasida bir-birini sevib qolgan. Tvinkl ushbu munosabatlarni suratga olish ishlari yakunlangach to‘xtaydi, deb o‘ylagan edi. Ammo hammasi nikoh bilan yanada mustahkamlandi. Ular 2001-yil turmush qurgan va ikki nafar farzandni tarbiyalab kelmoqda.

Bipasha Basu va Karan Singx Grover

Bipasha va Karan 2015-yilda “Yolg‘izlikda” filmining suratga olish maydonchasida uchrashgan va bir-birlarini yoqtirib qolgan. Bipasha bundan avval Jon Abraxam bilan 10 yillik munosabatlarga ega edi va bu ayriliq bilan tugagan. Karan ham ikki marta turmush qurgan bo‘lib, Bipasha uchinchi oilasi hisoblanadi.

Ritesh Deshmux va Jeneliya de Souza 

Ritesh “Senga qasam ichaman” filmini suratga olish uchun Haydarobodga uchgan va Jeneliyani uchratgan. Aktyorning so‘zlariga ko‘ra, bu bir qarashda sevgi bo‘lmagan, ammo uyga qaytganidan so‘ng Jeneliyani sog‘ingan. So‘ngra ular 9 yil davomida uchrashib yurgan va 2012-yil 3-fevralda turmush qurgan. Hozirda juftlik ikki o‘g‘ilni tarbiya qilmoqda.

Kunal Hemu va Soha Ali Xon

Juftlik “Sizni qayerga olib ketishdi” filmi jarayonida dastlab hech narsani sezmagan, ammo oradan ko‘p o‘tmay ular buning sevgi ekanini anglab yetgan. 2015-yilda juftlik turmush qurgan va Innaya ismli qizini tarbiyalamoqda.

Ali Fazal va Richa Chadda

“Dangasalar” loyihasi Ali va Richaning hayotida alohida o‘ringa ega. Ular suratga olish maydonchasida uchrashib, bir-birini sevib qolgan. Ular garchi hali turmush qurmagan bo‘lsa-da, to‘y haqida bir qancha rejalar tuzgan.