Germaniya kansleri Angela Merkel koronavirus bilan bog‘liq cheklovlarni ehtiyotkorlik bilan yumshatish tarafdori bo‘ldi, deb xabar bermoqda Spiegel nashriga tayanib “RIA Novosti”.
Xristian-demokratik ittifoq prezidiumining onlayn yig‘ilishi ishtirokchilarining fikriga ko‘ra, kansler cheklovlar yumshatilganda ko‘proq sinovlarni o‘tkazish kerak, deb hisoblaydi. Shu bilan birga, kansler fuqarolarning cheklovlar yumshatilishini qanchalik kutayotganini tushunishini ta’kidladi.
Merkel cheklovlarni yumshatish mumkin bo‘lgan uchta yo‘nalishni alohida ta’kidladi. Bular — shaxsiy muloqot doirasi, maktab hamda kasb-hunar kollejlari, shuningdek, madaniyat, restoran va sport. Shu bilan birga, kansler aholini hushyorlikni susaytirmaslikka chaqirdi.
“Interfaks”ning Yevropa ommaviy axborot vositalariga tayanib ma’lum qilinishicha, koronavirus bilan bog‘liq vaziyatga qaramay, yuz minglab nemis maktab o‘quvchilari o‘quv mashg‘ulotlariga qaytdi.
Hozirda Germaniyaning 16 federal shtatidan 10 tasida, shuningdek, Berlinda maktab o‘quvchilari masofaviy o‘qitishdan muntazam o‘qishga qaytgan.
Ko‘pgina maktablarda koronavirus bilan kasallanish ehtimolini kamaytirish uchun ehtiyot choralari qo‘llanilmoqda. Bir qator maktablarda sinflar ikkiga bo‘lingan, shuningdek, o‘quvchilar sinfdan tashqarida niqob taqishi kerak edi.
Berlindagi boshlang‘ich sinf o‘quvchilari esa dars paytida ham niqob taqib o‘tirishi shart. Saksoniyada esa sinflar kichik guruhlarga bo‘lingan.
Ko‘pgina federal shtatlarning ma’murlari o‘qituvchilarni COVID-19 uchun muntazam ravishda sinovdan o‘tkazishni rejalashtirmoqda.
Robert Kox institutining ma’lumotlariga ko‘ra, Germaniyada koronavirus bilan kasallangan jami 2 390 928 kishi aniqlangan, COVID-19 tashxisi qo‘yilgan 67 903 kishi vafot etgan.
Bundan avval Angela Merkel insoniyat qanday shart bilan koronavirus ustidan g‘alaba qozonishini ma’lum qilgani hamda Germaniya karantin cheklovlarini 7-martgacha uzaytirgani haqida xabar berilgandi.
Izoh (0)