“Neftchi” — “Turon” uchrashuvidagi janjalda ishtirok etgan shaxslarga sud hukmi o‘qildi

Futbol bo‘yicha O‘zbekiston Pro-Ligasining 2019/20-yilgi mavsumi 20-turidan o‘rin olgan “Neftchi” — “Turon” uchrashuvidagi janjalda ishtirok etgan shaxslarga sud hukmi o‘qildi.

O‘zbekiston axborot agentligining xabar qilishicha, 2021-yil 19-fevral kuni jinoyat ishlari bo‘yicha Farg‘ona shahar sudida “Neftchi” — “Turon” futbol o‘yinida kelib chiqqan janjal bo‘yicha jinoyat ishi ochiq sud majlisida ko‘rib tamomlangan.

Sudning hukmiga ko‘ra, ish bo‘yicha sudlanuvchi “Neftchi” jamoasi futbolchilari Doston Toshmatov, Jamshid To‘raqulov va shu kuni janjalda ishtirok etgan muxlislar, ya’ni sudlanuvchilar R. Alimov, A. Mahkamov, M. Parmonov A. To‘lqinboyev D. Tursunov va O. Abdullayev O‘zbekiston Respublikasi Jinoyat Kodeksining 277-moddasi 3-qismi “B” bandi (bezorilik, ya’ni ommaviy tadbirlar o‘tkazilayotgan vaqtda jamiyatda yurish-turish qoidalarini qasddan mensimasdan, urish-do‘pposlash, badanga yengil shikast yetkazish) bilan aybli deb topilib, ularning har biriga ayblangan modda sanksiyasi doirasida 4 yil muddatga ozodlikni cheklash jazosi tayinlandi.

Sudlanuvchilarga sutkaning soat 22:00 dan soat 06:00 gacha bo‘lgan vaqtda yashash joyidan chiqishi cheklanib, jazoni nazorat qiluvchi organning roziligisiz yashash joylarini o‘zgartirmaslik kabi qo‘shimcha taqiq yuklandi.

Sudlanuvchilarga nisbatan qo‘llanilgan “qamoqqa olish” tarzidagi ehtiyot chorasi bekor qilinib, sud zalida qamoqdan ozod qilindi.

Sudlanuvchilarga jazo tayinlashda muqaddam sudlanmaganligi, oilaviy sharoiti, qilmishidan chin pushaymonligi, yashash joyidagi Yoshlar ittifoqi, mahalliy kengashlar deputatlari, mahalla fuqarolar yig‘inlari va jamoatchilik guruhlari tomonidan berilgan kafolat xatlari va tavsifnomalarda ko‘rsatilgan holatlar inobatga olingan.

Bundan tashqari, mazkur janjalda ishtirok etgan sudlanuvchi G‘. Mullajonov jinoyatni o‘ta xavfli retsidivist bo‘lgani holda sodir qilganligi uchun unga nisbatan 3 yil muddatga ozodlikdan mahrum qilish jazosi tayinlandi.

Sudning hukmidan norozi taraflar hukm e’lon qilingan kundan, sudlanuvchilar va jabrlanuvchilar hukm nusxasini olgan kundan boshlab yigirma sutka ichida apellyatsiya tartibida shikoyat bermagan va protest bildirmagan taqdirda qonuniy kuchga kiradi.

Eslatib o‘tamiz, “Neftchi”—“Turon” uchrashuvi tugaganidan keyin “Neftchi” futbolchilari va muxlislar hakamlarga tashlangandi. Vaziyatlarning birida farg‘onaliklar o‘yinchisi uchrashuv bosh hakami Shavkat Nasibullayevga oyoq bilan zarba bergan. Keyinchalik hakamga zarba bergan futbolchi 98-raqamli Jamshid To‘raqulov ekanligi ma’lum bo‘lgandi.

Shundan so‘ng o‘yindan keyin yuzaga kelgan tartibsizliklarda ishtirok etgan besh nafar shaxsga nisbatan 15 sutka ma’muriy qamoq jazosi tayinlangani va olti kishiga nisbatan jinoyat ishi ochilgani, ular orasida ikki nafar “Neftchi” futbolchilari ham borligi haqida xabar berilgandi.

O‘zbekiston futbol assotsiatsiyasi mutaxassislaridan iborat maxsus ishchi guruh va Ichki ishlar vazirligi “Neftchi” — “Turon” uchrashuvining tashkiliy ishlariga mas’ul barcha tashkilotlar bilan hamkorlikda uchrashuvda yuzaga kelgan mojaro bo‘yicha surishtiruv ishlari olib borgandi. Surishtiruv natijalariga ko‘ra quyidagicha qarorlar qabul qilingandi:

• “Neftchi” klubi futbolchisi Jamshid To‘raqulov uchrashuv bosh hakami Shavkat Nasibullayevga qasddan tan jarohati yetkazgani uchun unga nisbatan O‘FA Intizom kodeksining 5.6 va 5.49-bandlariga asosan 10 yil muddatga futbol bilan bog‘liq har qanday faoliyat bilan shug‘ullanishdan chetlatish intizom chorasi qo‘llandi;
• “Neftchi” klubi futbolchilari Sherzod Abduraimov, Sanjar Zokirov va Jamshid Qobulov uchrashuv bosh hakamiga hujum qilganligi uchun ularning har biri O‘FA Intizom kodeksining 5.48-bandiga asosan 1 yil muddatga futboldan chetlatildi va 15 million so‘mdan jarimaga tortildi;
• “Neftchi” klubi futbolchisi Doston Toshmatov uchrashuv yordamchi hakami Saylavovga nisbatan tajovuzkor harakat qilganligi uchun Intizom kodeksining 5.49-bandiga asosan 10 ta rasmiy uchrashuvga diskvalifikatsiya qilindi;
• Uchrashuv yakunlangandan so‘ng muxlislar futbol maydonida va unga yondosh hududlarda tartibsizliklar keltirib chiqargani, “Neftchi” futbol klubi mas’ullari jamoat tartibini saqlash bilan bog‘liq yetarlicha choralar ko‘rilishini ta’minlamagani uchun “Neftchi” futbol klubiga nisbatan Intizom kodeksining 5.4-bandiga asosan 3 ta uy uchrashuvini muxlislarsiz o‘tkazish va 100 million so‘m miqdorida jarima intizom chorasi qo‘llandi.