Belgiyalik suratkash Iv Adams Janubiy Atlantika orolida noyob sariq pingvinni uchratib qoldi. Ilgari bu kabi qushlarni uchratish va kameraga tushirishning iloji ham bo‘lmagan, deb yozadi Esquire.
Adams o‘z guruhi bilan birgalikda 2019-yil dekabr oyida ekspeditsiya vaqtida sariq pingvinni uchratdi. Uning so‘zlariga ko‘ra, hammasi tasodifan sodir bo‘lgan. Suratkash va sheriklari 120 mingga yaqin qushlari bo‘lgan plyajda qayiqlarni yechib olayotgan edi. To‘satdan ularning yonida sariq rangli pingvin paydo bo‘lgan. Shunda ular qo‘llaridagi barcha ishni tashlab, suratga olishga shoshilgan.
“Uning yonimizga kelishi mo‘jiza edi. Agar bu bizdan 50 metr uzoqlikda sodir bo‘lganida ham uni umrimiz davomida hech qachon ko‘rmagan bo‘lar edik”, − deydi suratkash. Adams sariq pingvin bilan uchrashuvni “tabiat lotereyasidagi yutuq” deb biladi.
Belgiyalik suratkashning aytishicha, suratlar nashr etilganidan buyon ommaviy axborot vositalari va qiziquvchan odamlar tomonida iliq munosabat bildirilgan. “Bizga bu kabi kutilmagan sariq yangiliklar juda muhim. Yaxshi tilaklar uchun katta rahmat”, − deb yozadi Adams Instagram sahifasida.
Bundan avval 2012-yilda Antarktika pingvinlari orasida oq ranglisi uchragan edi. Mutaxassislar mutatsiya uning rangiga ta’sir qilgan, degan xulosaga kelgan edi. Ehtimol, sariq pingvin bilan ham xuddi shu hodisa ro‘y bergandir.
Izoh (0)