AQShda havo haroratining keskin tushib ketishi global isishning oqibati, dedi BMT bosh kotibi Antoniu Guterrish 18-fevral kuni o‘tkazilgan matbuot anjumanida. Bu haqda “Korrespondent.net” xabar berdi.

BMT bosh kotibi Antoniu Guterrish.

Foto: AP Photo

“O‘rtacha havo harorati ko‘tarilyapti, juda tez ko‘tarilyapti... Bularning barchasi asosan iqlim o‘zgarishining natijasi”, — dedi Guterrish.

Shuningdek, bosh kotibning ta’kidlashicha, keskin sovib ketish global isishni rad etmaydi, chunki “ba’zida natijalar harorat tushib ketishi bilan bog‘liq bo‘lsa ham, sodir bo‘layotgan barcha keskin jarayonlar iqlim o‘zgarishi tufayli yuzaga kelayotgan global muvozanat buzilishi oqibati hisoblanadi”.

Guterrishning aytishicha, shu sababli bo‘ronlar, anomal issiq va sovuq ob-havo kuzatilyapti.

Ma’lumot uchun, AQShning janubida kuchli qor bo‘roni kuzatildi. Texas shtatining o‘zida 4,5 million xonadon elektr energiyasi va issiqlik manbaidan uzilib qoldi. Kamida 21 kishi noqulay ob-havo qurboniga aylandi.

Avvalroq AQShning 20 dan ortiq shahrida past harorat bo‘yicha rekordlar yangilangani haqida xabar berilgan edi.